पोखरा । गण्डकी प्रदेशमा कोरोना भाइरसका २६ संक्रमित थपिएका छन् । प्रदेश स्वास्थ्य निर्देशनालयका अनुसार बिहीबार बिहान मात्र एकैपटक ६ जिल्लामा संक्रमण पुष्टि भएको हो । योसँगै गण्डकीमा संक्रमितको संख्या १,९७७ पुगेको छ ।
पर्वत (१), बागलुङ (८), कास्की (१), लमजुङ (४), तनहुँ (९) र नवलपरासी (३) गरी २६ जना थपिएका हुन् । थपिएका संक्रमित अधिकांश कन्ट्रयाक्ट ट्रेसिङमार्फत पहिचान भएका हुन् । पर्वत जलजला गाउँपालिकाका संक्रमित भारतबाट आएको निर्देशनालयले उल्लेख गरेको छ ।
बागलुङका १ प्रहरीमा समेत संक्रमण पुष्टि भएको छ । बागलुङका ७ जना पनि भारतबाटै आएको खुलेको छ । लमजुङ बेसीशहरमा कार्यरत थप २ जना नेपाली सेनामा पनि संक्रमण भेटिएको छ । १ जना भने पालिकामा कार्यरत कर्मचारी हुन् ।
पोखरा स्वास्थ्य विज्ञान प्रतिष्ठानको आकस्मिक कक्षमा उपचाररत १ जनामा समेत कोरोना देखिएको छ । पोखरा १६ का ७६ वर्षीय पुरुषमा संक्रमण पुष्टि भएको स्वास्थ्य निर्देशक डा विनोदविन्दु शर्माले जानकारी दिए । उनलाई अस्पतालको आइसोलेसनमा सारिएको उनले बताए ।
गण्डकीमा संक्रमणमुक्त हुनेको संख्या १ हजार ६ सय ६५ पुगेको छ । मृत्यु हुनेको संख्या भने ९ रहेको निर्देशनालयले जनाएको छ ।
बिहीबार पोखरा ११ की ३२ वर्षीया महिलाको कोरोनाका कारण निधन भएको छ । कोरोना देखिएपछि उनलाई भदौ ७ गते प्रतिष्ठानको आसियुमा राखी उपचार थालिएको थियो । बिहान ८ बजे उनको निधन भएको प्रतिष्ठानले पुष्टि गरेको छ ।
