काठमाडौँ । सरकारले पेट्रोलियम पदार्थमा गरेको मूल्यवृद्धिको विरोध गर्दै प्रचण्ड–माधव समूहका विद्यार्थी संगठन अनेरास्ववियूले विरोध प्रदर्शन गरेको छ ।
काठमाडौँमा रहेको त्रिभुवन विश्वविद्यालयका विभिन्न आंगिक क्याम्पसहरुमा बिहीवार विहान आन्दोलन गरेका थिए । बुधबार अनेरास्ववियूका सहसंयोजक रञ्जित तामाङले बुधवार विज्ञप्ति जारी गर्दै आन्दोलनको घोषणा गरेका थिए ।
सोही अनुरुप अनेरास्ववियूका विद्यार्थीहरुले आज बबरमहलस्थि नेपाल आयल निगमको कार्यलय घेराउ गर्न लागेका हुन् ।
भ्रष्टाचार र मूल्यवृद्धी नियन्त्रण गर्ने बताउँदै आएको सरकारले एक सातामै दुई पटक पेट्रोलियम पदार्थको मूल्यवृद्धी गरेपछि आलोचना बढेको हो ।
निगमले एक साताको बीचमा माघ २८ र फागुन ४ गते पेट्रोलियम पदार्थको मूल्यवृद्धि गरेको थियो । फागुन ४ गते डिजेल, पेट्रोल, मट्टीतेल र आन्तरिक हवाई इन्धनको मूल्य प्रतिलिटर दुई रुपैयाँको दरले बढाएको थियो भने माघ २८ गते खाना पकाउने ग्यासमा प्रतिसिलिण्डर २५ रुपैयाँ तथा पेट्रोल र डिजेलमा प्रतिलिटर दुई रुपैयाँको दरले मूल्य बढाएको थियो ।
