काठमाडौँ । बैतडी दोगडाकेदार गाउँपालिका–७ कि १७ बर्षीया किशोरी भागरथी भट्टको हत्या अभियोगमा पक्राउ परेका किशोरले बलात्कार समेत गरेको स्वीकार गरेका छन् ।
बिहीबार किशोरका बाबु समेतलाई राखेर सरकारी वकिलहरुले लिएको बयानमा किशोरले बलात्कारपछि हत्या गरेको स्वीकारेका हुन् । यसअघि आरोपित किशोरले आफुले बलात्कार नभई हत्यामात्र गरेको बयान दिएका थिए ।
भागरथीको शवको पोस्टमार्टम रिपोर्टमा बलात्कारपछि घाँटी थिचेर हत्या भएको उल्लेख गरिएको थियो । तर आरोपित किशोरले हत्या मात्र गरेको बताउँदै आएकोमा बिहीबार भने बलात्कारपछि हत्या गरेको बताएका हुन् ।
प्रहरीलाई आरोपित किशोरविरुद्ध थप अनुसन्धान गर्न जिल्ला अदालत बैतडीले अनुमती दिएको थियो । मंगलबार पक्राउ परेका आरोपितलाई बुधबार जिल्ला प्रहरी कार्यलय बैतडीले सार्वजनिक गरेको थियो ।
पक्राउ पर्नेमा भागरथी पढ्ने सनातन धर्म माविकै कक्षा ११ मा पढ्ने किशोर रहेका थिए । उनले बदलाको भावनाका कारण भागरथीको हत्या गरेको यसअघि नै स्वीकार गरिसकेका छन् ।
भागरथीको विभत्स हत्या भएपछि अनुसन्धानमा कुनैपनि कमजोरी नहोस् भनेर सुदूरपश्चिम प्रदेश प्रहरी प्रमुख डिआइजी उत्तमराज सुवेदी फिल्डमा खटिएका थिए ।
आरोपित पक्राउ परेपछि भागरथीका दाई शंकर भट्टले किटानी जाहेरी दिइसकेका छन् ।
