काठमाडौँ । सरकारबाट प्रतिवन्धित नेत्रविक्रम चन्द नेतृत्वको नेकपा सकारात्मक रहेको बताएको छ । शनिबार पार्टीका महासचिव नेत्रविक्रम चन्दद्वारा हस्ताक्षरित विज्ञप्तिमा सरकारसँग सम्बाद र वार्ताका लागि सकारात्मक रहेको जानकारी दिइएको छ ।
‘हाम्रो क्रान्ति राष्ट्र, समाज, अग्रगामी रुपान्तरण एवम् जनसमूदायको हित र अधिकारको लाग गरिएको सचेत पहल हो’, विज्ञप्तिमा भनिएको छ, ‘यसको प्रक्रियामा आम जनसमुदायमा सहज गतिविधि र कार्यक्रम गर्ने वातावरण बन्ने अवस्थामा हाम्रो पार्टी सरकारसँग वार्ताको लागि सकारात्मक रहेको विषय सबैमा जानकारी गराउँदछौं ।’
यसअघि विप्लव नेतृत्वको नेकपासहितका चार साना राजनीतिक दलहरुले मोर्चाबन्दी गरेको घोषणा गरेको थियो । मोर्चामा विप्लव नेकपा सहित मोहन बैद्य नेतृत्वको नेपाल कम्युनिष्ट पार्टी (क्रान्तिकारी माओवादी), ऋषिराम कट्टेल नेतृत्वको नेपाल कम्युनिष्ट पार्टी र विश्वभक्त दुलाल ‘आहुति’ नेतृत्वको वैज्ञानिक समाजवादी कम्युनिष्ट पार्टी रहेका छन् ।
मोर्चाबन्दी घोषणा गर्दै प्रधानमन्त्री केपी शर्मा ओलीले असंवैधानिक कदम चालेको र उक्त कदमको संयुक्त रुपमा विरोध गर्ने घोषणा समेत भएको थियो ।
प्रधानमन्त्री ओलीले संसद विघटन गरेपछि विभिन्न राजनीतिक दलहरुलाई आफ्नो समर्थनमा ल्याउने कोशिस गरेका छन् । यसै क्रममा सरकारबाट प्रतिवन्धित विप्लव नेतृत्वका नेकपा नेताहरुसँग प्रधानमन्त्रीका दूतहरुले जेलभित्र पनि भेट गरेका थिए ।
