काठमाडौँ । सरकारबाट प्रतिवन्धित नेत्रबिक्रम चन्द नेतृत्वको नेकपा नेता धर्मेन्द्र बास्तोला रिहा भएलगत्तै पक्राउ परेका छन् । सोमबार सर्वोच्च अदालतले रिहा गरेलगत्तै अदालत बाहिरिएका बास्तोला अदालत परिसरबाटै पक्राउ परेका हुन् ।
सर्वोच्च अदालतमा अनिमा बाँस्तोला भण्डारीले दायर गरेको बन्दी प्रत्यक्षीकरण रिटमा न्यायाधीशहरु मीरा खड्का र सुष्मालता माथेमाको इजलासले विप्लव नेता बाँस्तोलालाई रिहा गर्न आदेश दिएको थियो ।
रिहा भएलगत्तै प्रहरीले उनलाई अदालत परिसरबाट नै पुनः गिरफ्तार गरेको हो । उनीमाथि काभ्रेमा पुरानो मुद्दा बाँकी रहेकाले पुनः पक्राउ गरिएको महानगरीय प्रहरी कार्यालय रानीपोखरीले जनाएको छ । उनलाई आजै काभ्र पठाइने पनि प्रहरीले जानकारी दिएको छ ।
पुस २९ गते प्रहरीले उनलाई ललितपुर र मकवानपुरको सीमाक्षेत्रबाट पक्राउ गरेको थियो । त्यससता उनलाई प्रहरीले सर्वोच्चले रिहा गर्ने आदेश दिएपनि पटक पटक पक्राउ गर्दै आएको छ ।
प्रतिवन्धित विप्लव समूहले विज्ञप्ती जारी गरेरै सरकारसँग वार्ता गर्ने पक्षमा रहेको जानकारी दिएतापनी सरकारले भने विप्लवका नेता कार्यकर्ताहरुलाई पक्राउ गर्ने क्रम जारी नै राखेको छ ।
