काठमाडौं । बितेको २४ घन्टामा मुलुकभर ९२७ जनामा कोरोना भाइरस संक्रमित थप भएका छन् । योसँगै देशभर संक्रमितको संख्या ३६,४५६ पुगेको छ ।
त्यति नै अवधिमा विभिन्न ठाउँमा गरेर १२ जनाको मृत्यु भएको स्वास्थ्य तथा जनसंख्या मन्त्रालयलले जनाएको छ । एकैदिन मृत्यु पुष्टि भएको संख्यामध्येमा यो ठूलो हो । मुलुकरभर कोरोनाकारण ज्यान गुमाउनेको संख्या १९५ जना पुगेको छ ।
मन्त्रालयका प्रवक्ता डा जागेश्वर गौतमका अनुसार देशभरिमा १६,०१९ जना सक्रिय संक्रमित छन् ।
शुक्रबार ज्यान गुमाउनेमा ४ महिला र ८ पुरुष छन् । डा गौतमका अनुसार मोरङमा ५६ र ६५ वर्षीया २ महिला तथा भक्तपुरमा ६४ र मकवानपुरमा ७१ वर्षीया महिलाको मृत्यु भएको हो।
उदयपुरमा ५२ वर्षीय, पर्सामा ७२ वर्षीय, धनुषामा ४५ वर्षीय, सिराहामा ५५ वर्षीय, झापामा ८३ वर्षीय, चितवनमा ५१ वर्षीय, कास्कीमा ५२ वर्षीय र रूपन्देहीमा ६० वर्षीय पुरुषको मृत्यु भएको छ।
काठमाडौं उपत्यकामा मात्रै शुक्रबार ४१५ जनामा संक्रमण पुष्टि भएको छ । काठमाडौंमा३५०, भक्तपुरमा ५४ र ललितपुरमा ११ जनामा सङ्क्रमण पुष्टि भएको डा गौतमले जानकारी दिए ।
पछिल्लो २४ घन्टामा १०,२२९ वटा नमुनाको परीक्षण गरिएकोमा १६९ जना संक्रमणमुक्त भई घर फर्केका छन् । संक्रमितमध्ये मुलुकभर २०,२४२ जना निको भइसकेको मन्त्रालयले जनाएको छ ।
