काठमाडौं । स्वास्थ्य मन्त्रालयले निजी संस्थालाई दिएको पीसीआर परीक्षणको मूल्यमा ११ सयले घटाएको छ । यसअघि अधिकतम ५५ सय रुपैयाँ लिएर ११ वटा निजी अस्पताललाई परीक्षणको अनुमति थियो ।
नयाँ मूल्य मापदण्डअनुसार अब अधिकतम ४४ सय रुपैयाँ मात्र लिन पाउने व्यवस्था भएको मन्त्रालयका सहप्रवक्ता डा समीर अधिकारीले जानकारी दिए ।
उपत्यकाका ३ वटा र ६ वटा प्रदेशका ६ सरकारी अस्पतालबाट शुल्क तिरेर परीक्षण गराउन सकिन्छ । ‘निर्धारण गरिएको नयाँ शुल्कभन्दा धेरै कसैले पनि लिन नपाउने मन्त्रालयको निर्णय छ,’ डा अधिकारीले भने । उक्त निर्णय आइतबारदेखि नै लागु भएको उनले बताए ।
स्वास्थ्य मन्त्रालयले अब तीनवटा मापदण्डका आधारमा मात्र कोरोनाभाइरसको निशुल्क परीक्षण गर्ने निर्णय गरेको सहप्रवक्ता डा अधिकारीले जानकारी दिए । आवश्यकभन्दा अनावश्यक रूपमा धेरै मात्रामा परीक्षण हुन थाल्यो कि भनेर परीक्षणको व्यवस्था पुनरावलोकन गरिएको जानकारहरु भनाई छ ।
‘अब सङ्क्रमितको निकट सम्पर्कमा आएका, लक्षण देखिएका र अग्रभागमा काम गर्ने व्यक्तिहरूको मात्र निशुल्क परीक्षण गर्ने निर्णय भएको छ,’ डा अधिकारीले भने । अन्य व्यक्तिहरूले शुल्क तिरेर परीक्षण गराउन सक्नेछन्।
सरकारले निशुल्क परीक्षण गर्ने व्यवस्था रहेकाले कतिपयले आंशकाकै भरमा परीक्षण गराउन खोज्ने र भनसुन बढी हुने गरेका खबरबीच मन्त्रालयले नयाँ निर्णय लिएको हो।
