काठमाडौँ । नेकपा एमालेका वरिष्ठ नेता झलनाथ खनाल र निलम्बित नेता माधव कुमार नेपाल समूहले प्रधानमन्त्री समेत रहेका अध्यक्ष केपी शर्मा ओलीलाई नवौँ महाधिवेशनको संरचनामा फर्कँदै एकता जोगाउन आह्वान गरेको छ ।
कलंकीस्थित मेघा पार्टी प्यालेसमा बसेको स्थायी कमिटी बैठकले सर्वोच्चको आदेशसँगै पार्टी २०७५ जेठ २ गतेको अवस्थामा फर्किएको हुँदा संरचना र पदाधिकारीहरु पनि सोही बमोजिम हुनुपर्ने र सोही बमोजिम कायम गर्न अध्यक्ष ओलीलाई आग्रह गरेको हो ।
बैठकपछि पत्रकारसँग कुरा गर्दै एमाले नेता योगेश भट्टराईले विभिन्न अधिवेशन, महाधिवेशनबाट आएका कमिटीहरु पुनः सन्चालन गर्ने र आवश्यकता अनुसार गठन पुनर्गठन हुने बताए ।
‘नेकपा एमालेको एकतालाई जोगाऔं,कम्युनिस्ट आन्दोलनको रक्षा गरौं’ भन्ने मूल नाराका साथ दुई महिने अभियान चलाइने भट्टराईले बताए । यसक्रममा अध्यक्ष ओलीले आफ्नो निर्णय सच्याउनुपर्ने उनको भनाइ छ ।
बैठकले माधव नेपाल सहित ४ नेताहरुमाथि गरिएको कारवाहीको अर्थ नहुने समेत निष्कर्ष निकालेको छ ।
तात्कालिन नेकपा खारेज गरि सर्वोच्च अदालतले दुई कम्युनिस्ट पार्टीहरुलाई एकिकरण हुनुअघिकै अवस्थामा फर्काएपनि एमालेका अध्यक्ष रहेका प्रधानमन्त्री केपी शर्मा ओलीले फागुन २८ गते नवौँ महाधिवेशन मार्फत चयन भएका पदाधिकारीहरु खारेज गर्ने र अध्यक्ष र महासचिव पद मात्र कायम रहने निर्णय गरेका थिए ।
