काठमाडौं । बितेको २४ घन्टामा मुलुकभर १,२२८ जना कोरोना भाइरसका संक्रमित थप भएका छन् ।
त्यति नै अवधिमा विभिन्न ठाउँमा ६ जनाको मृत्यु भएको स्वास्थ्य तथा जनसंख्या मन्त्रालयले जनाएको छ ।
योसँगै देशभर संक्रमितको संख्या ४२,८७७ पुगेको स्वास्थ्य मन्त्रालयका प्रवक्ता डा जागेश्वर गौतमले जानकारी दिए ।
संक्रमितमध्ये मुलुकभर २४,२०७ जना निको भइसकेका छन् । मृत्यु हुनेको संख्या २५७ पुगेको छ ।
मन्त्रालयका प्रवक्ता डा गौतमका अनुसार १८,४१३ जनामा संक्रिय संक्रमण छ ।
जसमध्ये ७,७४२ जना घरमै र १०,६७१ जना संस्थागत आइसोलेसनमा छन् ।
यस्तै बितेको २४ घन्टामा काठमाडौं उपत्यकामा मात्रै ४४५ जना थपिएका छन् ।
काठमाडौंमा ३५७ जना, ललितपुरका ४६ जना र भक्तपुरका ४२ जनामा संक्रमण पुष्टि भएको हो ।
थपिएका संक्रमितमध्ये ३९४ जना महिला र ८३४ जना पुरुष छन् ।
उक्त अवधिमा ९१७ जना संक्रमणमुक्त भएको प्रवक्ता डा गौतमले जानकारी दिए ।
देशभर हालसम्म ५६ प्रतिशतले कोरोना जितिसकेका छन् ।
