पोखरा । लमजुङका ४ स्थानीय तहमा १४ जना थप कोरोना भाइरसका संक्रमित भेटिएका छन् । योसँगै गण्डकी प्रदेशमा संक्रमितको संख्या २,५३१ पुगेको स्वास्थ्य निर्देशनालयले जनाएको छ ।
आइतबार साँझ पुष्टि भएका लमजुङ सुन्दरबजार नगरपालिकाका २ जना सफाई कर्मचारीमा कोरोना पुष्टि भएको छ । उक्त पालिकामा ६ जनामा पुष्टि भएको हो । सोही पालिकाका २ पुरुष भने भारतबाट आएको खुलेको छ ।
बेसीसहर २ की ४१ वर्षीय पुरुष मुक्तिनाथ विकास बैंकको कर्मचारी भएको निर्देशनालयले जनाएको छ । मस्र्याङ्दी २ का ५८ वर्षीय पुरुष एम्बुलेन्स चालक हुन् । सुन्दरबजारका ६, बेसीसहरका ४, मस्र्याङ्दीका १ र राइनासका ३ जनामा संक्रमण पुष्टि भएको हो ।
प्रदेशभर संक्रमण मुक्त हुनेको संख्या १,७८५ जना रहेको निर्देशनालयले जनाएको छ । मृत्यु हुनेको संख्या १९ पुगेको छ । शनिबार उपचारको क्रममा गोरखामा मृत्यु भएकी ७६ वर्षीया वृद्धामा आइतबार मात्र संक्रमण पुष्टि भएको थियो ।
