पोखरा । पोखरामा पत्रिकाका दैनिक पाठकहरुका लागि परिचित नाम हो कृष्ण थापा । पत्रिका पढ्ने मात्रै होइन पोखरामा उनलाई नचिन्ने कमै होलान् ।
एकाबिहानै उठेर पत्रिका बेच्न पोखराका सडकहरुमा हिड्ने उनी आफ्नै कर्ममा जीवन चलाइरहेका छन्। हातमा पत्रिका अनि झोला भिरेर सडक र गल्लीमा पत्रिका बेच्नु उनको दैनिकी हो ।
शारिरीक रुपमा फरक क्षमताका कृष्ण आफ्ना दैनिक जीवनका काम सकेसम्म आफै गर्छन् । र पनि संगै रहेकी बुद्ध आमा उनलाई सक्दो सहयोग गर्ने प्रयास गर्छिन् ।
बृद्ध आमाको साथ बसेका उनी धेरैका लागी प्रेरणाका स्रोत बन्न सक्छन् । शारिरीक रुपमा अशक्त भएपनि दैनिक काम गरेर जीवन चलाइरहेका उनै कृष्ण बुधबार बैवाहिक जीवनमा बाँधिएका छन् । पोखरा न्युरोड बस्ने उनी धादिङ घर भएकी पुजा थापा मगरसंग लगनगाँठो कसेका छन्।
कृष्णको दैनिक जीवनी बारे मेन मिडिया प्रालीले डकुमेन्ट्री समेत बनाएको थियो । उक्त डकुमेन्ट्रीलाई ईन्टरन्यास्नल ह्युमन राईटस् फिल्म फेस्टिवल र पोखरा फिल्म फेस्टिवलमा समेत देखाइएको थियो । डकुमेन्ट्री हेर्ने सबैले कृष्णको जीवनी फरक क्षमता राख्नेका लागी मात्रै नभइ सबैका लागी प्रेरणादायी रहेको प्रतिक्रिया दिएका थिए ।
