पोखरा । आइतबार दिवङ्गत नेपाली काँग्रेस कास्कीका नेता भोजबहादुर गुरुङ ‘सिकन्दर’ को आज अन्त्येष्टि गरिएको छ ।
पोखरा रामघाटस्थित बौद्व अर्घौ सदनमा बौद्व परम्परानुसार उहाँको अन्त्येष्टि गरिएको हो । अन्त्येष्टिअघि पोखरा महानगरपालिका वडा नं ५ पस्र्याङस्थित गुरुङ निवासमा पार्टीका सहमहामन्त्री डा प्रकाशशरण महत, पूर्वमहामन्त्री तारानाथ रानाभाट, नेता शुक्रराज शर्मा, जिल्ला सभापति कृष्ण केसी र पूर्वमन्त्री यज्ञबहादुर थापाले पार्टीको चारतारे झण्डा ओढाएर गुरुङप्रति श्रद्वाञ्जलि व्यक्त गर्नुभएको थियो ।
केही समयअघिदेखि बिरामी गुरुङको उपचारका क्रममा पोखराको गण्डकी मेडिकल कलेजमा ५८ वर्षका उमेरमा आइतबार दिउँसो निधन भएको हो । उहाँका श्रीमती र दुई छोरा हुनुहन्छ ।
विसं २०१९ असार २९ गते कास्कीको अन्नपूर्ण गाउँपालिका वडा नं ४ भदौरे देउरालीमा जन्मनुभएका गुरुङ हाल पस्र्याङमा बस्दै आउनुभएको थियो । गुरुङ पार्टीभित्र इमान्दार, निष्ठावान्, सरल र त्यागी नेताका रुपमा परिचित हुनुहुन्थ्यो । लोकतन्त्र प्राप्तिका हरेक सङ्घर्षमा अग्रमोर्चामा रहेर भूमिका निर्वाह गर्नुभएका गुरुङ निडर र स्पष्ट वक्ता हुनुहन्थ्यो ।
विनास्वार्थ पार्टीको सशक्तीकरण र कार्यकर्ताको समस्याबारे खुलेर बोल्न सक्ने नेताकोे छवि बनाउनुभएका गुरुङ पछिल्लो पटक कास्की क्षेत्र नं ३ख बाट प्रदेशसभामा उम्मेदवार बन्नुभएको थियो ।
यसैबीच काँग्रेस कास्कीले आज शोक विज्ञप्ति प्रकाशन गरी गुरुङको निधनले पार्टी स्तब्ध भएको जनाएको छ । जिल्ला सभापति केसीले जारी गर्नुभएको विज्ञप्तिमा नेपाल विद्यार्थी संघमा क्रियाशील रहँदादेखि नै जुझारु क्रान्तिकारी स्वभावका गुरुङ निष्ठावान्, इमान्दार, त्यागी, निडर र निस्वार्थी स्वभावको भएको उल्लेख छ ।
