पोखरा । पोखरा र आसपास क्षेत्रका कोरोना संक्रमितको चिकित्सकीय हेरचाह गर्न पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पतालको आइसोलेसनमा ल्याइन्छ । त्यससँगै पोखरा ३० मोहरियाको सरुवा रोग अस्पतालको आइसोलेसनबाट पनि संक्रमितको हेरचाह हुँदै आएको छ ।
कास्कीमा पहिलोपटक स्थानीय तहकै प्रयासमा रुपा गाउँपालिकाले भने आफ्नै आइसोलेसन सञ्चालन गरेको छ । कोरोना महामारीको सुरुवातमै भयावह स्थितीको पूर्वानुमान गर्दै गाउँपालिकाले वडा १ स्थित गैरीभञ्ज्याङमा आइसोलेसन बनाउन थालिसकेको थियो ।
फलस्वरुप आइसोलेसन निर्माणको ३ महिना पछि पहिलोपटक प्रयोगमा आएको छ । अदिभूमि संस्थाको तालिम केन्द्रको भवन १२ वर्षदेखि प्रयोगविहीन थियो । त्यहीँ अलपत्र संरचनालाई मर्मत गरी रुपाले आइसोलेसनको रुप दिएको हो । आइसोलेसनको क्षमता हाल २० बेडको छ ।
लक्षण नदेखिएका कोरोना संक्रमितलाई उक्त आइसोलेसनमा राखिएको गाउँपालिका अध्यक्ष नवराज ओझाले जानकारी दिए ।
‘गाउँपालिकाको क्वारेन्टिनमा बसेकाहरुको परीक्षण गर्दा संक्रमण पुष्टि भएकाहरुलाई आफ्नै आइसोलेसनमा सोमबारदेखि राख्न थालेका छौं,’ उनले भने, ‘लक्षण देखिएकालाई पश्चिमाञ्चल अस्पतालको आइसोलेसनमा राखेका छौं । हाम्रो आइसोलेसनमा लक्षण नभएकामात्रै राख्छौं ।’
रुपामा पछिल्लो समय संक्रमण पुष्टि भएका ५ जनामध्ये ४ जनालाई गैरीभञ्ज्याङको आइसोलेसनमा राखिएको छ । ६ जनाको टोली भारतको केरलाबाट आई गाउँपालिकाको क्वारेन्टिनमा बसेका थिए । जाँच गर्दा ५ जनामा कोरोना भेटियो । तीमध्ये पनि १ जनामा कोरोना लक्षण देखिएकाले पश्चिमाञ्चल क्षेत्रीय अस्पतालको आइसोलेसनमा पठाइएको अध्यक्ष ओझाले जानकारी दिए ।
आइसोलेसन व्यवस्थापनका लागि गाउँपालिकाले विशेष टोली खटाएको छ । त्यहाँ खटिने टोली र संक्रमितले प्रयोग गर्ने धारा र शौचालय पनि छुट्टाछुट्टै व्यवस्था गरिएको अध्यक्षले बताए ।
चिकित्सक, हेल्थ असिस्टेन्ट, अनमी, सुरक्षाकर्मी र अन्य सहयोगीहरु गाउँपालिकाको तर्फबाट खटाइएको छ ।
गाउँपालिकामा हालसम्म १६ जनामा संक्रमण पुष्टि भएको छ । ११ जना निकाे भई घर गएका छन् । सक्रिय संक्रमित ५ जना छन् । मुलुकबाहिरबाट आई क्वारेन्टिनमा बस्नेको संख्या १३ रहेको गाउँपालिकाले जनाएको छ । बाहिरबाट आउनेहरुलाई अनिवार्य क्वारेन्टिनमा बस्नुपर्ने नियम गाउँपालिकाको छ ।
संक्रमितलाई आयुर्वेद औषधि र नियमित व्यायाम
गाउँपालिकाको आइसोलेसनमा रहेका व्यक्तिहरुको हेरचाहमा ध्यान दिँदै उनीहरुलाई नियमित आयुर्वेद औषधि दिइएको छ । च्यावनप्रास, यष्टीमधु चूर्ण, गुडुची चूर्ण, तुलसी चिया, त्रिकटु चूर्ण लगायतका औषधि मात्रा मिलाएर दिन थालिएको हो ।
गाउँपालिकाका आयुर्वेद संयोजक वेचन शाहले संक्रमित सबैलाई आयुर्वेद औषधि दिइएको जानकारी दिए । स्वास्थ्य तथा जनसंख्या मन्त्रालयको आयुर्वेद तथा वैकल्पिक चिकित्सा विभागले स्वास्थ्यमा प्रभाव नपार्ने तर संक्रमितको रोग प्रतिरोधात्मक क्षमता बढाउन सहयोग पुग्ने औषधि सेवन गर्न भनेको छ ।
पहिलोपटक आइसोलेसन संचालन गर्दा चुनौतीको रुपमा लिएको गाउँपालिकाका स्वास्थ्य संयोजक आनन्दलाल जोशीले बताए । संक्रमितको नियमित मनटरिङ गर्ने गरिएको र लक्षण देखिएमा पोखरा तुरुन्तै पठाइने व्यवस्था मिलाइएको उनको भनाई छ ।
आइसोलेसनमा संक्रमिमतको हेरचाहमा खटिएका डा अकिञ्चन काफ्लेले कोरोना नियन्त्रणमा सबै क्षेत्रबाट सहयोग हुनुपर्ने बताए । आयुर्वेद औषधिको प्रयोगमा भने अझ अध्ययन आवश्यक रहेको उनको भनाई छ ।
आयुर्वेद औषधि उपलब्ध गराउने पपुलर आयुर्वेद सेन्टरका सञ्चालक कृष्ण राउतलाई गाउँपालिकाले आभार व्यक्त गरेको छ । आइसोलेसनमा रहेका संक्रमितलाई शारिरीक व्यायाम तथा योगा समेत गराइँदै आएको गाउँपालिकाले जनाएको छ ।
