पोखरा । पोखरा महानगरपालिकाद्वारा सञ्चालित गण्डकी बहुप्राविधिक शिक्षालयलाई पश्चिमाञ्चल अटोमोबाइल डिलर्स एशोसिएसनले स्वागत गरेको छ । सोमबार १ विज्ञप्ति जारी गर्दै एशोसिएसनका अध्यक्ष चन्द्रबहादुर कुँवरले शिक्षालयले सञ्चालन गर्न लागेको डिप्लोमा इन अटोमोबाइल इन्जिनियरिङ कोर्षले अटोमोबाइल इन्जिनियरिहरुको अभाव टार्ने जनाएका छन् ।
‘शिक्षालयबाट उत्पादन हुने अटोमोबाइल इन्जिनियरहरुबाट यस क्षेत्रमा अभाव खड्कीरहेको अटोमोबाइल इन्जिनियरहरुको मागलाई पूरा गर्ने अपेक्षा गरेका छौं,’ विज्ञप्तिमा भनिएको छ, ‘पोखरा महानगरको उत्कृष्ट कार्यको प्रशंसा गर्दै एशोसिएसन सदैव सहकार्य गरी अघि बढ्ने छ ।
एशोसिएसनका अध्यक्ष कुँवरले एसइई उत्तिर्ण विद्यार्थीहरुलाई उक्त कोर्षमा भर्ना भई अध्ययन गर्न आह्वान गरेका छन् ।
शिक्षालयले डिप्लोमा इन सिभिल इन्जिनियरिङ र डिप्लोमा इन अटोमोबाइल इन्जिनियरिङको पढाइका लागि ३ वर्षे कोर्षको भर्नाका लागि आवेदन खुला गरिसकेको छ ।
एसइई उत्तीर्ण विद्यार्थीले असोज १५ गतेसम्म अध्ययनको लागि आवदेन दिन सक्ने शिक्षा महाशाखा प्रमुख हेमप्रसाद आचार्यले जानकारी दिएका छन् । २ विषयमा ४८÷४८ कोटा निर्धारण गरिएको छ भने विभिन्न छात्रवृत्तिको पनि व्यवस्था गरिएको आचार्य बताए । १० वटा पूर्ण छात्रवृत्ति र ६ वटा कोटा सहुलियत र ३२ वटा कोटा खुला रहेका छन् ।
पोखरा महानगरपालिकाले बजारको मागका आधारमा दक्ष प्राविधिक जनशक्ति उत्पादनको लक्ष्य सहित ‘गण्डकी बहुप्राविधिक शिक्षालय’ स्थापना गरेको हो ।
अटोमोबाइल इन्जिनियरिङ सम्बन्धी आवश्यक सीपको अभावमा यहाँका युवा बेरोजगार बस्नुपर्ने बाध्यता रहेको अवस्थामा पोखरा महानगरपालिकाले यस क्षेत्रमा आवश्यक दक्ष जनशक्ति उत्पादन गर्ने लक्ष्य अनुसार अटोमोवाइल इन्जिनियरिङको अध्यापन सुरु गरेको हो ।
महानगरले प्राविधिक शिक्षा तथा तालीम परिषद् (सिटिइभिटी)बाट सम्बन्धन लिएर वडा २९ भण्डारढीकमा स्थापना गरेको बहुप्राविधिक शिक्षालयबाट प्राविधिक विषयमा अध्यापन हुनेछ ।
पछिल्ला वर्षहरुमा तीव्र विकास भएको क्षेत्रमा अटोमोबाइल पर्दछ । स्वदेशभित्रै गाडीका पार्टपुर्जा तथा उपकरणहरुको उत्पादन नभए पनि छिमेकी मुलुकबाट आयात हुन्छ । गाडी तथा यसका पार्टपुर्जाको आयातसँगै यसको मर्मत सम्भारको काम गर्ने अधिकांश जनशक्ति समेत विदेशी नै छन् ।
उच्च रोजगारी प्राप्तिको क्षेत्र भएपनि देशभित्र सो कामका दक्ष जनशक्ति नहुँदा ठूलो धनराशी बाहिरिएको छ । सिभिल इन्जिीनियरिङ अधिकांश प्राविधिक शिक्षालयहरुमा पढाइ हुने भएपनि अटोमोबाइल पढाइ हुने कलेज तथा क्याम्पसहरु नगन्य छन् । इन्जिनियरिङ अध्ययन संस्थान अन्तर्गतको पश्चिमाञ्चल क्याम्पसमा केही वर्ष अघि अटोमोबाइल विषय अध्यापन गरिए पनि पनि हाल सोको पठन पाठन हुँदैन ।
यस वर्ष पहिलोपटक दुई विषयमा प्राविधिक विषय अध्यापन गरिएपनि शिक्षालयको पूर्वाधार निर्माणपछि प्राविधिक धारका कक्षाहरु समेत थप गरिने छ ।
सिभिल इन्जिनियरिङका लागि ३ वर्षको १ लाख ९५ हजार शुल्क छ भने, अटोमोबाइलको १ लाख ७५ हजार तोकिएको छ । आफ्नै पूर्वाधार नबन्दासम्म सुरुआतमा महानगरले जनप्रकाश माध्यमिक विद्यालयमा कक्षा सञ्चालन गर्ने योजना बनाएको छ ।
पोखरा महानगरपालिकाका केही वडा कार्यालयहरुले आफ्नो वडामा बसोबास गर्ने विद्यार्थी मध्येबाट १ जनालाई वडा कार्यालयकै खर्चमा पढाउने प्रतिबद्धता व्यक्त गरेका छन् ।
