पोखरा । पोखरा महानगरपालिका १७ पार्दीस्थित ज्येष्ठ नागरिक वैदिक सनातन (वेदान्त दर्शन) सत्संग स्थलमा अध्ययनरत घरेलु श्रमिक बालबालिलाई लायन्स क्लब अफ पोखरा टुरिजमले शैक्षिक सामग्री वितरण गरेको छ ।
साँझ बिहान अर्काको घरमा काम गर्दै आएका तथा पोखराका विभिन्न वर्कसप कार्यरत श्रमिकलाई शिक्षा प्रदान गर्ने उद्देश्यका साथ सञ्चालित सो संस्थामा अध्ययनरत ३० जना बालबालिकालाई आज आयोजित एक समारोहका बीच आवश्यक शैक्षिक सामग्री वितरण गरिएको हो ।
लायन्स क्लबका डिष्ट्रिक गभर्नर मानबहादुर रोकाहाले श्रमिक बालकलाई शैक्षिक सामग्री हस्तान्तरण गर्दै लायन्सले विशेष गरि पछिल्लो समय बालबालिका र ज्येष्ठ नागरिकको क्षेत्रमा लक्षित कार्यक्रमलाई प्राथमिकतामा राखेको उल्लेख गरे ।
क्लबका अध्यक्ष निरज पन्तकाअनुसार सत्संग भवनका लागि आवश्यक कार्पेट, शैक्षिक सामग्री र ज्येष्ठ नागरिकको स्वास्थ्य परिक्षणका साथै निशुल्क औषधि वितरणसँगै १ लाख रुपैयाँ भन्दा बढीको सहयोग गरेको हो ।
ज्येष्ठ नागरिक वैदिक सनातन (वेदान्त दर्शन) सत्संगका अध्यक्ष टोपराज ढुंगानाले घर, होटल, रेष्टुरेन्ट तथा वर्कसपहरुमा श्रम गर्ने श्रमिक बालबालिको शिक्षा दिक्षा एवम् ज्येष्ठ नागरिकको लागि दिवा सेवा केन्द्र सञ्चालन गर्दै आएको बताए ।
सो संस्थामा हाल ३० जना श्रमिक बालबालिका अध्ययनरत रहेका छन् भने २५ जना भन्दा बढी ज्येष्ठ नागरिकले दिवा सेवा लिइरहेको बताउँदै उनले संस्थाको सकृयतामा सार्वजनिक जग्गामा ३ लाख रुपैयाँको लागतमा ट्रष्ट भवन निर्माण गरिएको जानकारी दिए ।
कार्यक्रममा पोखरा १७ का वडा सदस्य शान्ता गुरुङ, चियर पर्सन जमुना गुरुङ, राधीका थापा, सिता थापा, क्लबका निवर्तमान अध्यक्ष विनय थापा र सचिव सुजन श्रेष्ठ लगायतले सामाजिक सेवामा समर्पित लायन्स क्लबले समाजमा प्रशंसनीय कार्य गर्दै आएको धारणा राखे ।
पोखरा उद्योग वाणिज्य संघद्वारा बालश्रम न्यूनिकरण कार्यक्रम अन्तर्गत श्रमिक तथा जोखिममा रहेका बालबालिकालाई पठनपाठन गराउने लक्ष्यका साथ सुरु गरिएको सो संस्थाले अक्षर चिनाउने र पायक पर्ने सरकारी विद्यालयमा भर्ना गरिदै उनीहरुको पढाइलाई निरन्तरता दिँदै आएको छ ।
