पोखरा । पोखरा महानगरपालिका २४ कास्कीकोटमा सेनेटरी प्याड बनाउने तालिम सम्पन्न भएको छ । पोखरा जेसिजको सप्ताहव्यापी कार्यक्रम अन्तर्गत चौथो दिन महिलाहरुलाई सेनेटरी प्याड बनाउन सिकाएको हो ।
नेपाली महिलाहरुमा हुने महिनावारीको समस्यामा उचित हेरचाह नगर्दा पाठेघर तथा यौन सम्बन्धि विभिन्न रोगहरु लाग्न सक्ने जोखिम रहेको कुरालाई मध्यनजर गर्दै जेसिजले उक्त कार्यक्रमको आयोजना गरेको हो । तालिममा पुनः प्रयोग गर्न मिल्ने सेनेटरी प्याड बनाउन सिकाइएको थियो । पखेटा नेपालको सहकार्य तथा वडाको सहयोगमा जेसिजले उक्त कार्यक्रम सम्पन्न गरेको हो ।
महिलाहरुले आफ्नो लागी स्वास्थ्यको ख्याल राख्नुपर्ने र सेनेटरी प्याडको प्रयोगबाट कसरी फाइदा हुन सक्छ भन्नेबारेमा प्रीति मगरले जानकारी समेत दिइएकी थिइन् । उनले महिनावारी हुदाँ आउने परिवर्तन र त्यसको असरको बारेमा समेत प्रशिक्षण दिएकी थिइन् । पखेटा नेपालकी अध्यक्ष तथा प्रशिक्षक बिनु श्रेष्ठले प्याड बनाउन सिकाउँदै कसरी प्रयोग गर्न सकिन्छ भन्नेबारे जानकारी दिएकी थिइन् ।
बजारमा पाउने प्याडमा केमिकल हुने हुँदा पाठेघरमा क्यान्सरको जोखिम हुने हुँदा कपडाको प्याड बढी सुरक्षित रहेको बताइन् ।
तालिममा सिकाइएको प्याड वातावरणमैत्री रहेको उनले बताइन् । सोही क्रममा बोल्दै पोखरा २४ का वडा अध्यक्ष ओम प्रसाद सुवेदीले वडालाई प्राथमिकतामा राख्दैँ तालिम ल्याउनी सम्मनिय कार्य रहेको बताए ।
कोभिड १९ ले अस्तव्यस्त समयमा समेत महिला स्वास्थ्य कार्यक्रम ल्याउनु सान्दर्भिक रहेको बताए । पूर्वाधार विकास मात्र विकास नभई नागरिकको स्वास्थ्य, नेतृत्व विकास समेत समाजको विकास भएको उनले बताए ।
तालिमले वडामै प्याड निर्माण गर्ने हौसला मिलेको बताउँदै उनले अब महिलाको लागि प्याड वडामै बनाउने प्रतिबद्धता व्यक्त गरे । सोही क्रममा बोल्दै वडा सचिव कुस्मराज सुवेदीले महिनावारीको समयमा टालोको प्रयोग गर्दा ग्रामिण क्षेत्रका महिलाहरुमा पाठेघर सम्बन्धी समस्या हुँदै आएको बताए ।
महिलाहरुले बाहिरी कपडा राम्रो लगाएपनी भित्री कपडा भने स्वास्थ्य विपरीत लगाउँदण समस्या खेप्नुपरेको उनले सुनाए । ‘महिलाहरु महिनावारी हुँदा एउटा प्याड ४ घण्टा भन्दा प्रयोग गर्न मिल्दैन भनेर विश्व स्वास्थ्य संगठनले समेत भनेको छ । तर बिना सुरक्षा लामो समयसम्म प्रयोग गर्दै आएका छन् । यसले निकै असर गर्न सक्छ,’ उनले भने । कार्यक्रममा जेसिज पोखराका प्रतिनिधिहरुको सहभागिता थियो ।
