काठमाडौं । ०७२ वैशाख १२ गतेको महाभूकम्पले क्षति पुर्याएको ऐतिहासिक धरहरा पुनर्निर्माणको काम चलिरहेको छ ।
२२ तलाको डिजाइनमा काम भइरहेकोमा हाल १६ औं तलाको ढलान सम्पन्न भइसकेको राष्ट्रिय पुनर्निर्माण प्राधिकरणले जनाएको छ । बाँकी ६ तलाको काम कुनै बाधा नआए अबको ३ महिनामा सकिसक्ने प्राधिकरणको भनाई छ ।
ढलानसँगै टावरको प्लाष्टर, परिसर घेर्ने पर्खाल र पार्किङ क्षेत्रको काम पनि उस्तै रफ्तारमा भइरहेको प्राधिकरणले जनाएको छ ।
०७७ असोज महिनाभित्र पुनर्निर्माण सक्ने गरी काम भएपनि कोरोना महामारीको असरका कारण समयसीमा नसकिने निश्चित बनेको हो ।
रमन कन्सट्रक्सनले धरहरा पुनर्निर्माणको जिम्मा लिएको छ । २ वर्षमा सम्पन्न गर्ने गरी उक्त कम्पनीले ३ अर्ब ४८ करोड लागतमा ठेक्का लिएको थियो । प्रधानमन्त्री केपी शर्मा ओलीले ०७५ मा धरहरा पुनर्निर्माणको शिलान्यास गरेका थिए ।
पुरानो धरहराभन्दा नयाँ बन्ने धरहराको आयतन ठूलो हुने छ । दुईवटा लिफ्ट पनि हुनेछ । साथै एउटा परम्परागत भर्याङ रहनेछ ।
लिफ्ट र भर्याङ दुईवटै माध्यमबाट धरहरा चढ्न सकिनेछ । ४२ रोपनी क्षेत्रफलमा निर्माण सुरु गरिएको धरहरा बाहिरबाट हेर्दा ११ तलाको हुने भएता पनि भित्र भने २२ तला, उचाइ ७२ मिटर र ४८ फिटको बेस रहनेछ ।
बगैंचा, संग्रहालय, रंगीन जलफोहरा, प्रदर्शनी हल, पार्किङस्थल, पसल रहनेछन् । गोश्वारा हुलाक भएको स्थानमा उद्यान बनाइनेछ ।
उद्यानभित्र बस्ने ठाउँ, ढुङगेधारा, हरियाली, चमेनागृह हुनेछ । धरहरामा पढ्न चाहने, ध्यान गर्न चाहने या बस्न चाहने सबैका लागि सुविधा उपलब्ध हुनेछन् ।
बालबालिका तथा ज्येष्ठ नागरिकमैत्री हुने र त्यहाँ आउने अवलोकनकर्ता सवारी साधनको व्यवस्थित पार्किङ गर्न सकिने गरी पुनर्निर्माण हुनेछ ।