काठमाडौँ । कर फर्छ्यौट आयोगका तत्कालीन सचिव चुडामणी शर्माविरुद्धको भ्रष्टाचार मुद्दामा विशेष अदालतले ५० लाख धरौटी माग गरेको छ ।
कर फर्छ्यौट आयोगमा हुँदा विभिन्न करदाताहरूलाई अनियमिततापूर्वक छुट दिएको भन्दै चार वर्षअघि अख्तियार दुरूपयोग अनुसन्धान आयोगले उनी विरूद्ध चारवर्षअघि भ्रष्टाचार मुद्दा दायर गरेको थियो ।
सो मुद्दामा सुनुवाई गर्दै विशेष अदालतका सदस्य न्यायाधीश अब्दुल अजिज मुसलमान र नित्यानन्द पाण्डेयको इजलासले शर्मासँग ५० लाख धरौटी माग गरेको अदालतले जनाएको छ।
चार वर्षअघि शर्मा, कर फर्छ्यौट आयोगका तत्कालिन अध्यक्ष लुम्बध्वज महत र सदस्य उमेश प्रसाद ढकाल विरूद्ध अख्तियारले १ अर्ब ३३ लाखको भ्रष्टाचार मुद्दा लगाएको थियो।
सोही मुद्दाको प्रकृयामा सहभागी हुन शर्मा सोमबार उपस्थित भए। उनी उपस्थित भएपछि सोमबारै थुनछेक बयान र बहस भएको थियो।
करदाताहरूको विभिन्न कर शीर्षकमा कर बक्यौता रहेकोमा कर फर्छ्यौट आयोगका पदाधिकारीहरूले आपसी कुराकानीलाई मात्र आधार लिई कर छुट दिने गरी सम्झौता गरी मनोमानी किसिमले बदनियतपूर्वक एक अर्ब ३३ लाख २० हजार ३८५ रुपैयाँ बक्यौता कर छुट दिएको पुष्टि भएको अख्तियारको भनाइ छ ।