काठमाडौं । बुधबार नियुक्त गरिएका ३ मन्त्रीले पद तथा गोपनियताको सपथ ग्रहण गरेका छन् । राष्ट्रपति विद्यादेवी भण्डारीले शिलत निवासमा आयोजित कार्यक्रममा अर्थमन्त्रीमा विष्णु पौडेल, सहरी विकास मन्त्रीमा कृष्णगोपाल श्रेष्ठ र महिला तथा बालबालिका मन्त्रीमा लीलानाथ श्रेष्ठलाई सथप गराएकी हुन् ।
बुधबार प्रधानमन्त्री केपी शर्मा ओलीको सिफारिसमा राष्ट्रपति भण्डारीले मन्त्रिपरिषद्मा हेरफेर साथै ३ मन्त्री थप गरेकी थिइन् । यसअघि राष्ट्रिय सभाकाे पदावधि समाप्त भएपछि डा युवराज खतिवडाकाे स्वत: अर्थमन्त्रीकाे कार्यकाल सकियाे । उक्त पद रिक्त रहँदै आएकाे थियाे ।
अन्तत: यसअघिका पूर्वअर्थमन्त्री सुरेन्द्र पाण्डेकाे नाम पनि चर्चामा आयाे तर बाजी मारे नेकपाकै अर्का प्रभावशाली नेता विष्णु पाैडेलले ।
ईश्वर पोखरेललाई रक्षा मन्त्रालयबाट जिम्मेवारी मुक्त गराई प्रधानमन्त्री कार्यालय मातहत मात्र रहने गरी उपप्रधानमन्त्रीमा सीमित गरिएको छ । उनी विनाविभागीय मन्त्री सरह हुनेछन् । यसअघि महिला तथा बालबालिका मन्त्रालयको जिम्मेवारी पाएका पार्वत गुरुङलाई सञ्चार तथा प्रविधिको जिम्मेवारी सुम्पिइएको छ ।
सपथ ग्रहण समाराेहमा उपराष्ट्रपति, प्रधानमन्त्री, सभामुख तथा मन्त्रिगणलगायतको उपस्थिति थियो ।
