काठमाडौं । संघीय सांसदहरुले दशैँ भत्ता लिएको विषय सार्वजनिक भएपछि सत्तारुढ नेकपाका नेता भीम रावलले सार्वजनिक रुपमै आफ्नो खातामा आएको भत्ता बापतको रकम कट्टी गर्न भनेका छन् ।
कोरोना महामारीको विषम कठिनाइलाई मनन् गरी कुनैपनि जनप्रतिनिधिले दशैँ भत्ता लिन नहुने उनको भनाई छ ।
उनले ट्विटमार्फत भनेका छन्, ‘खातामा भत्ताको रकम राखिएको थाहा पाइयो । हालको विषम स्वास्थ्य चुनौती र आर्थिक कठिनाइलाई मनन गरी कुनैपनि जनप्रतिनिधिले दसैं भत्ता नलिने व्यवस्था गरियोस् ।’
सांसदहरूले दशैँ भत्ता लिन नहुने विचारमा आफ्नो समर्थन जनाउँदै उनले लेखेका छन्, ‘मेरो खाताबाट रकम कट्टी गर्न मञ्जुरी छ ।’
दसैं भत्ताको रकम नलिन कुनै कानून संशोधन गर्न वा नयाँ कानून बनाउन नपर्नेसमेत उनले उल्लेख गरेका छन् ।
यसअघि नेकपाका प्रवक्ता नारायणकाजी श्रेष्ठले पनि १ वर्षको तलब, भत्ता नलिने घोषणा गरिसकेका छन् ।
संघीय कानुनमा सांसदहरुलाई दशैँ भत्ता सम्बन्धी व्यवस्था गरिएको छैन ।
