कुनैबेला खाली खुट्टा दौडिएरै नेपाललाई अन्तर्राष्ट्रिय स्तरको प्रतियोगितामा पदक जिताउन सफल पुराना खेलाडी जितबहादुर केसीको दिनचर्या अहिले फरक छ ।
तैपनि बिगतमा आफूले हाँसिल गरेका उपलब्धी सम्झिँदा जितबहादुर अहिले पनि उत्तिकै रोमान्चित हुने गर्दछन् ।
विसं २००४ सालमा दोलखाको चरिकोटमा जन्मिएका जितबहादुर २०२१ सालमा नेपाली सेनामा भर्नासँगै खेल क्षेत्रमा होमिएका थिए । सेनामा ५ माइलको दौडमा पहिलो भएपछि राष्ट्रिय खेलकुद परिषद्ले उनलाई काजमा राखेर तालिम दिन थाल्यो ।
विसं २०२४ सालमा काठमाडौंमा आयोजित राष्ट्रिय एथ्लेटिक्स प्रतियोगितामा १० हजार मिटरको दौडमा प्रथम भएपछि जितबहादुरको खेल जीवनले नयाँ फड्को मार्यो ।
सन् १९७० मा छैटौँ एसियाली खेलकुदमा पहिलो पटक अन्तर्राष्ट्रिय प्रतियोगितामा भाग लिएका जितबहादुर सन् १९७३ मा फिलिपिन्सको राजधानी मनिलामा आयोजित एसियाली ट्र्याक एण्ड फिल्डको म्याराथन प्रतिस्पर्धामा नेपाललाई पहिलो अन्तरर्राष्ट्रिय पदक दिलाएर इतिहास रच्न सफल भएका थिए ।
सो प्रतियोगितामा जितबहादुरले खाली खुट्टा दौडिएर नेपाललाई पहिलो कास्य पदक दिलाएका थिए ।
जुत्ताको कुरा पनि रोचक छ । बासबारी छाला जुत्ता कारखानाले एउटा जुत्ता बनाएर दिएको थियो ।
तर, त्यो १ दिन पनि टिकेन । मनिलामा भएको एसियन ट्रयाक एन्ड फिल्डमा म्याराथनमा दौड्दा जापनीज टाइगर जुत्ता लगाएर दौडिएका थिए ।
तर दौड्ने क्रममा एउटा जुत्ता आधामा च्यात्तिएकोले बाँकी रहेको एउटा जुत्ता पनि त्यही मिल्काइदिए । खाली खुट्टा दौड्दा जितबहादुरका १० औंला रगताम्यै भएका थिए ।
मुलुकलाई अन्तर्राष्ट्रिय पदक जिताएर काठमाडौं फर्किए लगत्तै राजधानीबासीले उनको स्वागतमा सिन्दुर जात्रा गरे ।
तत्कालीन राजा वीरेन्द्रले जितबहादुरलाई तराईमा मौजा, काठमाडौंमा घर र दैनिक १० रुपैयाँ भत्ता दिन भनेका थिए ।
व्यवस्था परिवर्तन भयो । तर आजसम्म पनि उनले केही पाएका छैनन् ।
सन् १९७२ मा जर्मनीमा आयोजित म्युनिख ओलम्पिक्समा नेपालका तर्फबाट राष्ट्रिय झण्डा जितबहादुरले बोक्ने अवसर पाएका थिए ।
सो प्रतियोगिताका क्रममा ‘ब्याल्क सेप्टेम्बर’ नामक प्यालेस्टिनी आतंकवादी समूहले इजरेली ओलम्पिक टोलीका सदस्यहरूलाई नियन्त्रणमा लिई हत्या गरेको घटना आफ्नो स्मरणमा अझै ताजै रहेको उनी बताउँछन् ।
४ दशक भन्दा अगाडिको खेलकुद प्रतियोगितामा आफूले गरेको दुःख र अहिले खेलकुदमा भएको विकास तुलना गर्नै नसकिने उनको अनुभव छ ।
लोकतन्त्र आएपछि पनि बैकुण्ठ मानन्धर, दिपक विस्ट र संगिना वैद्यहरुलाई सरकारले पुरस्कार बापत पैसा दियो । तर त्यो पनि उनले नपाएको बताउँछन् ।
वर्तमान खेलकुद मन्त्री जगतबहादुर विश्वकर्माले मासिक १० हजारको व्यवस्था गरिदिएका छन् ।
हाल राष्ट्रिय खेलकुद परिषद्मै काम गर्दे आएका जितबहादुर राज्यले खेलाडी र खेल क्षेत्रलाई उपेक्षा गर्न नहुने सुनाउँछन् ।
खेलाडीको भविष्य सुनिश्चित गर्ने तर्फ ध्यान दिनु पर्ने उनको भनाई छ ।