काठमाडाैं । गिरिजा प्रसाद कोईराला फाउण्डेशनको आयोजनामा नेपाली कांग्रेसको चौधौं महाधिवेशन र महिला नेतृत्वबारे नेपाली कांग्रेसका महिला केन्द्रीय सदस्यहरुबीच भर्चुअल छलफल कार्यक्रम बुधवार सम्पन्न भएको छ ।
फाउण्डेशनका अध्यक्ष एवं पूर्व उपप्रधान एवं परराष्ट्रमन्त्री सुजाता कोईरालाको अध्यक्षतामा सम्पन्न भएको सो कार्यक्रममा सहभागी केन्द्रीय महिला नेताहरु बिचमा साझा निष्कर्ष निकालिएको छ ।
नेपाली कांग्रेसले महिला सहभागिताको लागि कम्तिमा ३३ प्रतिशत महिलाहरुलाई क्रियाशिल सदस्यता बनाउनै पर्ने, केन्द्रदेखि पार्टिको तल्लो निकायसम्म रहेका आठ वटै संरचनामा कम्तिमा ३३ प्रतिशत महिला सहभागिता अनिवार्य हुनुपर्ने, महिला माथिको हिंसा, बलात्कार र हत्याको घोर भत्र्सना गर्दै दोषिलाई कारवाही र पीडितलाई न्याय दिलाउनका लागि सरकारको ध्यानाकर्षण गराउने बिषयमा गम्भीर छलफल भएको अध्यक्ष सुजाता कोईरालाले बताइन् ।
उक्त छलफलमा बोल्दै महिला केन्द्रीय सदस्यहरुले सरकारले बहुमतको आधारमा संविधान मिच्ने, संघिय लोकतान्त्रिक गणतन्त्रलाई नै स्वीकार नगर्ने, संवैधानिक निकाय माथिको हस्तक्षेप गर्ने कुरा कुनै पनि हालतमा स्विकार्य नहुने, वर्तमान समयमा कोरोनाको महामारी बढिरहेकोले निशुल्क रुपमा स्वास्थ्य परिक्षण र उपचार सरकारले गर्नुपर्ने बताएका छन् ।
कोभिड १९ का कारण विश्वभरि परेको असरसँगै नेपालमा गरीब निमुखा, दैनिक ज्याला मजदुरी गरेर जीवनयापन गर्ने वर्गको अवस्थालाई मध्यनजर राखी जारी राखिएको निशुल्क रुपमा खाना खुवाउने अभियानलाई रोक्नुपर्ने भनी सरकार र काठमाडाैं महानगरपालिकाले दिएको अभिव्यक्ति मानवता विरोधी भएको हुँदा यस कार्यलाई तत्कालै रोक्नुपर्ने कुरामा समेत जोड दिइएको छ ।
उक्त कार्यक्रममा नेपाली कांग्रेस पार्टी कोषाध्यक्ष तथा पूर्व मन्त्री सीतादेवी यादव, नेपाली कांग्रेसका केन्द्रीय सदस्यहरु डा.डिला संग्रौला, पुष्पा भुसाल, कमला पन्त, रत्ना शेरचन, किरण यादव, सिता गुरुङ, सुजाता परियार लगायतका केन्द्रीय नेताहरुले आफ्नो विचार राखेका थिए।
जिपी कोईराला फाउण्डेशनले केही दिन अघि मात्र नेपाल महिला संघका जिल्ला सभापतिहरुसँग समेत भर्चुअल छलफल कार्यक्रम सम्पन्न गरेको फाउण्डेशनका आ.केन्द्रीय सदस्य विमला भण्डारीले जानकारी दिइन् । आगामी महाधिवेशनमा महिलाहरुको अर्थपूर्ण सहभागिता बढाउनका लागि यस्ता छलफल कार्यक्रम कोशेढुंगा सावित हुने जनाइएको छ ।
