तनहुँ । ‘सेती नदीमाथि पक्की पुल नहुँदा कोही बिरामी परे भने डोकोमा बोकेर ल्याउनुपर्थ्यो’, तनहुँको ऋषिङ गाउँपालिका–४ गुम्लेकका बुद्धराज मल्ल विगत सम्झन्छन् , ‘त्यतिबेलाको समयमा दुई घण्टाभन्दा बढी हिँड्नुपर्ने वाध्यता थियो । झोलुङ्गे पुलबाट बोकेरै तारेपछि मात्रै गाडीमा राखेर सदरमुकाम दमौली पुर्‍याउनु पर्ने हुन्थ्यो ।’

तनुहँका दक्षिणी भेगमा रहेको ऋषिङ गाउँपालिकाका विभिन्न वडाका बासिन्दाले अहिले भने राहतको श्वास फेर्न पाएका छन् । कोही बिरामी भए भने पहिले जस्तै बोकेर नै अस्पताल पु¥याउनु पर्ने सास्तीको समाप्त भएको छ । त्यसको कारण हो, ब्यास नगरपालिका–१३ र ऋषिङ गाउँपालिका–१ जोड्ने सुढेस्थित सेती नदीमा पक्की पुलको निर्माण । पुल निर्माण भएसँगै त्यहाँका स्थानीयवासी २०÷३० मिनेटमै अस्पताल पुग्न सक्छन् ।

“अब चाहिँ सहज हुने भयो, गाडीमा २०÷३० मिनेटमै पक्की पुलसम्म आइपुगिन्छ”, मल्लले भने “दुःखका दिन सकियो ।”उनले ऋषिङपट्टिको सडक सफा गर्न आवश्यक रहेको औँल्याउदै भने, “पहिराले सडक अलिकति अप्ठ्यारो छ, त्यसलाई गाउँपालिकाले सफा गरिदिए हुन्थ्यो ।”

ऋषिङ गाउँपालिका–४ नाजुङका वीरबहादुर थापा पनि सेतीनदीमा पक्की पुल निर्माण भएपछि खुशी छन् । “पुल नहुँदा कष्ट थियो, कृषिजन्य सामग्री पनि बोकेरै ल्याउनुपर्ने बाध्यता थियो”, उनले भने, “अब त पुल बन्यो, गाडी पनि चल्छ, सहज हुने भयो ।”

सङ्घीय सरकारको सडक डिभिजन कार्यालय तनहुँमार्फत उक्त पुल निर्माण सम्पन्न भएको हो । एक सय पाँच मिटर लम्बाइ रहेको उक्त पुल विसं २०७१ असार २९ गते निर्माण शुरु भएर २०७७ वैशाख ३० गते सम्पन्न भएको थियो । १० करोड ७१ लाख २७८ लागत रहेको उक्त पुलको ठेक्का भरतपुरस्थित एडभेन्चर कन्स्ट्रक्सन प्रालीले पाएको थियो । सो पुल हुँदै ऋषिङको दुवुङ, मौरीबास, नाजुङ, बैदी, अर्चले पुग्न सकिन्छ ।

पुल निर्माण उपभोक्ता समितिका अध्यक्ष खामबहादुर मल्लले लामो समयको पर्खाईपछि बल्ल पुल निर्माण सम्पन्न भएकाले दक्षिणी भेगका बासिन्दालाई ठूलो राहत पुगेको बताए । “पुल निर्माणका लागि विगतमा तीन पटकसम्म निर्णय गरेर तत्कालीन जिल्ला विकास समितिमार्फत पहल गरेका थियौँ”, उनले भने, “तर खै के कारणले हो पुलको योजना पर्न सकेन ।”

लामो समयको प्रयासपछि पुल निर्माणका लागि बजेट परेको र पुल पनि निर्माण सम्पन्न गर्न सकिएको अध्यक्ष लामाले बताए । “यो पुलले दक्षिणी भेगका बासिन्दाका लागि विकासको ढोका खुलेको छ”, उनले भने, “पैदल हिँडेर झोलुङ्गे पुलमार्फत आवतजावत गर्नुपर्ने बाध्यताको अन्त्य भएको छ ।”

ऋषिङ गाउँपालिकाका अध्यक्ष राजेन्द्रकृष्ण श्रेष्ठले ऋषिङतर्फको सडक साँघुरो रहेकाले गाउँपालिकाले त्यसलाई स्तरोन्नति गर्ने आश्वासन दिए । “बाटो साँघुरो छ, केही ठाउँमा पहिराले अवरुद्ध पनि बनाएको छ, त्यसलाई तत्कालै स्तरोन्नति गर्छौं”, उनले भने, ‘अबको गाउँसभाबाट ५० लाख बजेट विनियोजन गरेर बाटोको स्तरोन्नती गर्नेछौँ ।’ रासस