काठमाडौँ । फ्याँकिएको चुरोटको बट्टा, पुनः प्रयोग सम्म हुन नसक्ने प्लाष्टिकका झोलाहरु । सोही चुरोटको बट्टा र प्लाष्टिकबाट बनेका विभिन्न किसिमका हस्तकला र त्यसमै रमाइरहेका बालबालिकाहरु । त्यही बिचमा छन् ७÷८ जना युवाहरु । बालबालिकाहरु तिनै कागजबाट विभिन्न किसिमका हस्तकलाका सामाग्रीहरु बनाउन प्रयास गरिरहेका छन् । युवाहरु सिकाइरहेका छन् ।

माथिका दृश्यहरु राजधानीको तिनकुनेस्थित बानेश्वर बहुमुखी क्याम्पसको एउटा हलमा चलिरहेको क्रियाकलाप हुन् । ‘सेभ अ चाइल्ड्स् फ्युचर’ ले तिनकुने क्षेत्रवरपरका बालबालिकाहरुलाई विगत एक महिनादेखि यस्तै कक्षा दिइरहेको छ । तिनकुने क्षेत्रका सुकुम्बासी टोलमा रहेका बालबालिकाहरुलाई सहभागी गरेर संस्थाले ‘आर्ट एण्ड क्राफ्ट’ कक्षा संचालन गरेको हो ।

कोभिड–१९ महामारीको समयमा सुरक्षा अपनाउदै संस्थाले उक्त कार्यक्रम ल्याएको परियोजनाको संयोजक सञ्जु ढकालले बताएकी छिन् । परियोजनामा सञ्जु सहित, गौतम श्रेष्ठ, सुरक्षा पौडेल लगायतका युवाहरुले बालबालिकाहरुलाई सिकाउँदै आएका छन् । परियोजनामार्फत बालबालिकाहरुलाई थप रचनात्मक बनाउदै प्रयोगमा आउन नसक्ने सामाग्रीबाट कसरी हस्तकलाका विभिन्न बस्तुहरु बनाउन सकिन्छ भन्नेबारे प्रयोगात्मक ज्ञान दिइएको संयोजक ढकालले बताइन् ।

परियोजनामार्फत बालबालिकाहरुलाई कागजका टुक्रा, चुरोटको बट्टा लगायतका सामाग्री प्रयोग गरि आकर्षक हस्तकला बनाउन सिकाइएको थियो । यसरी काम नलाग्ने भनेर फालिएका चुरोटका बट्टाबाट पनि आकर्षक फोटो फ्रेम र प्लाष्टिकका झोलाबाट आकर्षक फुल बनेपछि कक्षामा सहभागी २५ जना विद्यार्थीहरु दंग छन् ।

आफुले पहिलो पटक फालिएको फोहोर जन्य बस्तुबाट आकर्षक हस्तकला बनाएको बताउँछिन् सहभागी कौशिला तोलाङ्गे । उनले त्यहाँबाट सिकेपछि घरमा समेत चुरोटका बट्टा तथा प्लाष्टिक संकलन गरि फ्रेम तथा फुलहरु बनाउन थालेको बताएकी छिन् । आफुले सिकेका कुरालाई व्यवहारमा उतार्ने प्रतिवद्धता समेत उनले व्यक्त गरिन् ।

‘सेभ अ चाइल्ड्स् फ्युचर’ले विशेषगरि सुकुम्वासी बस्तीका बालबालिकाहरुलाई लक्षित गरि विभिन्न परियोजनाहरु संचालनमा ल्याउने गरेको संयोजक ढकालले बताएकी छिन् । ‘आर्ट एण्ड क्राफ्ट’ कक्षामा २५ जना विद्यार्थीहरुले सहभागीता जनाएको उनले बताइन् । यस्ता किसिमका अन्य कार्यक्रमहरु पनि आगामी दिनहरुमा संचालन गरिने उनले बताइन् ।