काठमाडौँ । बलात्कारको आरोपमा पुर्पक्षका लागि थुनामा रहेका ‘सिद्धबाबा’ भनिने कृष्णबहादुर गिरीले सोमबार सफाई पाए । आफ्नै अनुयायीमाथि बलात्कार गरेको आरोप लागेका गिरीलाई जिल्ला अदालत सुनसरीले सफाई दिएको हो ।
बलात्कारका आरोपितलाई एकतर्फी रुपमा फैसला गर्दै सफाई दिइएको भन्दै चौतर्फी आलोचना शुरु भएको छ । जिल्ला अदालत सुनसरीका न्यायाधीश अर्जुनप्रसाद कोइरालाको इजलाशले उनीमाथि लागेको अभियोग दाबी नठहर्ने भन्दै सफाई दिएको हो ।
न्यायाधीश कोइरालाले पेशी सार्नको लागि जिल्ला सरकारी वकिल कार्यलयले पठाइएको पत्रको बेवास्ता गर्दै फैसला सुनाएका हुन् । महान्यायाधिवक्ता कार्यालयमा पठाएको मिसिल आइनसकेको र यसअघि सिद्धबाबाको वकिल हेर्ने सरकारी वकिल सरुवा भएकाले सोमबारको पेशी सार्न माग गरेको थियो । सरकारी वकिल कार्यलयले पठाएको निवेदन नियोजित रुपमा दर्ता नगरि एकतर्फी बहससँगै सिद्धबाबालाई सफाइ दिने फैसला सुनाइएको छ ।
सिद्धबाबाले यसअघि नै बलात्कारको आरोप स्वीकार गरेको अडियो रेकर्ड सार्वजनिक भएको थियो । २०७६ कात्तिक ४ मा आफ्नै अनुयायीमाथि बलात्कारको आरोप लागेको थियो । उनलाई प्रहरीले पक्राउ गरि मुद्धा चलाएको थियो । जिल्ला अदालत सुनसरीको यसअघिको फैसलामा उनलाई तीन लाख धरौटीमा रिहा गर्न आदेश गरिएको थियो ।
जिल्ला अदालत सुनसरीको फैसला उल्ट्याउँदै उच्च अदालत बिराटनगरले सिद्धबाबालाई पुर्पक्षका लागि थुनामा राख्न आदेश दिएको थियो । उच्च अदालतको आदेश पश्चात सिद्धबाबा सर्वोच्च अदालत पुगेका थिए । सर्वाेच्चले पनि उच्च अदालतकै फैसला सदर गरेको थियो । सर्वोच्चले फैसला गरेको दश दिनपछि जिल्ला अदालतले सफाइ दिएको हो ।
