काठमाडौँ । प्रधानमन्त्री निवास बालुवाटारमा सर्वदलीय बैठक शुरु भएको छ । प्रधानमन्त्री केपी शर्मा ओलीले बोलाएको सर्बदलीय बैठकमा संघीय संसदमा प्रतिनिधित्व गर्ने सबै दलका प्रतिनिधि उपस्थित भएका छन् ।
देशको समसामयीक राजनीतिक अवस्थाका बारेमा छलफल गर्न प्रधानमन्त्रीले सर्वदलीय बैठक बोलाएका हुन् । पछिल्लो समयमा राजावादीहरुले गणतन्त्रका बिरुद्धमा नाराबाजी गर्दै सडकमा उत्रिन थालेपछि प्रधानमन्त्री ओलीले सर्वदलीय बैठक बोलाएका हुन् ।
देशव्यापी रुपमा राजावादीहरुको प्रदर्शन र त्यसमा राष्ट्रिय प्रजातन्त्र पार्टीको समर्थन भएपछि यसअघिको नेकपा सचिवालय बैठकमै यसबारेमा कुरा उठेको थियो । बैठकले नै प्रधानमन्त्री ओलीले तत्काल सर्वदलीय बैठक आह्वान गरि पछिल्लो अवस्थाका बारेमा सबै राजनीतिक दलसँग छलफल गर्न सुझाव दिएको थियो ।
बैठकमा प्रधानमन्त्री ओलीसहित नेकपा अध्यक्ष पुष्पकमल दाहाल प्रचण्ड, वरिष्ठ नेता माधव कुमार नेपाल, झलनाथ खनाल, उपाध्यक्ष वामदेव गौतम, कांग्रेसको तर्फबाट सभापति शेरबहादुर देउवा, वरिष्ठ नेता रामचन्द्र पौडेल, नेता कृष्ण सिटौला, सहमहामन्त्री डा प्रकाशशरण महत,नेमकिपाको तर्फबाट प्रेम सुवाल, जनता समाजवादी पार्टीका तर्फबाट उपेन्द्र यादवलगायतको सहभागिता रहेको छ ।
