काठमाडौँ । शुक्रबार साँझ कलंकी दुर्घटनामा परि मृत्यु हुनेको संख्या ३ पुगेको छ । नागढुंगाबाट कलंकीतर्फ आउँदै गरेको प्रदेश २–०३–००१ ख १४३० नम्बरको ट्रक ब्रेक फेल भई भएको दुर्घटनामा थप दुई जनाको मृत्यु भएको हो ।
शुक्रबार साँझ ओखलढुंगा घर भएका ३० बर्षीय शंकर परियारको घटनास्थलमै मृत्यु भएको थियो भने रञ्जित कुमार चौधरीको उपचारको क्रममा मृत्यु भएको थियो । शनिबार बिहान दुर्घटनाग्रस्त ट्रक निकाल्ने क्रममा किचिएको अवस्थामा थप एक जनाको शव फेला पारिएको प्रहरीले जनाएको छ ।
यो सँगै ट्रक दुर्घटनामा मृत्यु हुनेको संख्या ३ पुगेको हो । शनिबार फेला पारिएको शवको भने परिचय खुलेको छैन । महानगरिय ट्राफिक प्रहरी प्रभाग कलंकीका प्रहरी निरिक्षक पुरुषोत्तम कार्कीका अनुसार ब्रेक फेल भएको ट्रकले विभिन्न ६ वटा सवारी साधनलाई ठक्कर दिँदै घरभित्र छिरेको थियो । ट्रकको ठक्करबाट घरको वाल भत्किएको कारण अन्य मान्छे पनि पुरिएको हुनसक्ने बताइएको छ ।
यस्तै दुर्घटनामा ३० वर्षीय गणेश शर्मा, २२ वर्षीय साजन खत्री, धादिङ घर भएका ३६ वर्षीय रामचन्द्र सिंखडा, कलंकी घर भएका सुजन मानन्धर, बानेश्वरका २४ वर्षीय विशाल श्रेष्ठ र कास्की घर भएकी सन्ध्या थिङ घाइते भएका छन् । उनीहरुको राजधानीका विभिन्न अस्पतालमा उपचार भइरहेको प्रहरीले जनाएको छ ।
ब्रेक फेल भएको ट्रकको ठक्करबाट बा.२ ज २०४७ नम्बरको ट्याक्सी, बा.४च २२१ नम्बरको पिकअप भ्यान (डीआई), बा.४ख ३२५२ नम्बरको बस र बा.५१ प ४९५१ नम्बरको मोटरसाइकलमा क्षति पुगेको छ । त्यस्तै, प्रदेश ३–०२००६प १३४१ नम्बरको मोटरसाइकल र बा.४७ प २४५१ नम्बरको स्कुटरमा पनि क्षति पुगेको प्रहरीले जनाएको छ ।
