काठमाडौँ । चर्चित हास्यकलाकार मनोज गजुरेलले आफु पूर्वपत्नीबाट मानसिक रुपमा प्रताडित बनेको खुलासा गरेका छन् । उनले सामाजिक संजालमार्फत कानुनी रुपमा अलग भइसक्दा पनि पूर्वपत्नी आफुबिरुद्ध गालीबेइज्जतीमा उत्रिएको र विभिन्न किसिमका मानसिक तनाव दिन थालेको बताएका हुन् ।

उनले पूर्वपत्नीले विभिन्न माध्यमहरुबाट आफुमाथि बारम्बार गालीबेइज्जती गर्ने क्रम नरोकिएको जानकारी दिएका छन् । आफु सार्वजनिक रुपमा जिम्मेवार नागरिक र दुई सन्तानको जिम्मेवार वहन गर्दै आइरहेको कारण दोस्रो पक्षबाट आउने हरेक किसिमका गालीबेइज्जती सहँदै आएको समेत बताएका छन् ।

तर, गालीबेइज्जतीको श्रृंखला अनावश्यक रुपमा बढ्दै गइरहेको र यसले परिवारमा पनि असर पार्न थालेको कारण कानुनी उपचारमा जाने गजुरेलले उद्घोष गरेका छन् । ‘सकिएको सम्बन्धको आधारहीन आरोप र प्रत्यारोपले मेरा छोराछोरीलाई धेरै ठुलो असर गर्न थालेको महसुस हुँदैछ । मेरो चरित्रमाथी खेलवाड भएको ठान्दैछु । अब मैले अदालतमा बुझाउन आवस्यक नठानेको मेरो डिभोर्सको कारण र प्रमाणलाई अब सार्वजानिक गर्न बाध्य हुँदै गएको ठान्दैछु’, गजुरेलले फेसबुकमा लेखेका छन्, ‘सहनुको सिमा कटेपछी कानुनी उपचारको बाटो अपनाउनुको विकल्प नरहेको टुंगोमा पुगेको छु ।’

गजुरेलले केही दिन अघि आफुले दोस्रो विवाह गर्न लागेको कुरा सार्वजनिक गरेका थिए । उनले कहिले र कोसँग गर्ने भन्ने बारेमा भने केही खुलाएका थिएनन् । उनको पूर्वपत्नी मीना ढकालसँग तीन बर्ष अघि नै डिभोर्स भइसकेको थियो । कानुनी रुपमा अलग्गै भएपछि उनले विवाहको योजना बनाएका थिए । विवाहको कुरा सार्वजनिक भएपछि उनलाई उनकी पूर्वपत्नीले मानसिक रुपमा तनाव दिएको बताइएको छ ।