काठमाडौँ । प्रधानमन्त्री केपी शर्मा ओलीले मन्त्रीपरिषद् बैठक बोलाएका छन् । मंगलबार जारी भएको अध्यादेशको विषयमा छलफल गर्नका लागि प्रधानमन्त्री अोलीले बिहीबार साँझ ६ बजेका लागि मन्त्रिपरिषद्को बैठक बोलाएका हुन् ।
प्रधानमन्त्री निवास बालुवाटारमा बस्ने बैठकले अध्यादेश खारेज सम्बन्धमा छलफल गर्ने छ । जारी भएको अध्यादेश खारेज गर्नका लागि राष्ट्रपतिबाट अर्को अध्यादेश जारी गराउनुपर्ने प्रावधान अनुसार सोको सिफरिसका लागि मन्त्रिपरिषद बैठक बस्न लागेको हो ।
बुधबार प्रधानमन्त्री केपी शर्मा ओली अध्यादेश फिर्ता गर्न सहमत भएका थिए । पार्टीका कार्यकारी अध्यक्ष प्रचण्ड र महासचिव विष्णु पौडेलसहितको वार्तामा प्रधानमन्त्री ओलीले संवैधानिक परिषद् ऐन संसोधन अध्यादेश जारी गर्न सहमती जनाएका थिए ।
प्रधानमन्त्री ओलीमाथि संवैधानिक निकायमा आफुपक्षका ब्यक्तिहरुलाई नियुक्त गर्नका लागि राष्ट्रपतिबाट अध्यादेश जारी गराएको आरोप छ । परिषद्को बैठकमा सभामुख र प्रमुख प्रतिपक्षी दलका प्रमुख अनुपस्थित हुन थालेपछि प्रधानमन्त्रीले ओलीले राष्ट्रपतिबाट परिषद््को बैठकका लागि बहुमत सदस्यको उपस्थितिमा पनि गणपुरक पुग्ने आशयको अध्यादेश जारी गराएका थिए ।
अध्यादेश जारी भएपछि पार्टीभित्रबाटै प्रधानमन्त्री ओलीविरुद्ध विरोध उठेको थियो । नेकपाकै सांसदहरु हस्ताक्षर पत्र लिएर तत्काल संसद अधिवेशन बोलाउन माग गर्दै राष्ट्रपति कार्यालय शीतलनिवास पुगेका थिए । चौतर्फी घेराबन्दीमा परेपछि प्रधानमन्त्री ओली अध्यादेश फिर्ता गर्न सहमत भएका थिए ।
