काठमाडौँ । सरकारलाई एकहप्ता भित्र उखु किसानको रकम भुक्तानीको व्यवस्था मिलाउन संसदीय समितिले निर्देशन दिएको छ ।
बिहीबार सिंहदरबारमा बसेको प्रतिनिधिसभाको उद्योग तथा वाणिज्य र श्रम तथा उपभोक्ता हित समितिले एक हप्ताभित्र किसानले पाउनुपर्ने बक्यौता रकम दिलाउने व्यवस्था गर्नका लागि सरकरालाई निर्देशन दिएको हो ।
राजधानीको माइतीघरमा आन्दोलित किसानहरु यसपाली आफुले पाउनुपर्ने रकम नलिई नफर्कने बताएका छन् । किसानहरुले तत्कालका लागि प्रधानमन्त्री राहत कोषबाट रकम भुक्तानी गर्नुपर्ने र अघिल्लो बर्ष भएको सम्झौता कार्यान्वयनको माग गरेका थिए ।
यता, रौतहटको श्रीराम सुगर मिलले किसानहरुको बक्यौता रकम भोलीदेखि नै किसानकै खातामा पठाउन शुरु गर्ने भएको छ । वैठकमा उद्योगमन्त्रीले किसानको हकहितका लागि बाहिरबाट बोलेजस्तो गर्ने नेताहरुले व्यवहारमा त्यस्तो नदेखिने बताएका थिए । आफुलाई विभिन्न राजनीतिक दलका नेताहरुले फोन गरेर उद्योगीलाई कारवाही नगर्न सिफारिस गरेको बताउँदै उद्योगमन्त्री भट्टले यसबाट किसान मारमा परेका बताए ।
