काठमाडौँ । प्रधानमन्त्री केपी शर्मा ओलीले पुनः संवैधानिक परिषद्को बैठक बोलाएका छन् । संवैधानिक परिषद् ऐन संसोधन अध्यादेश फिर्ता गर्न सहमत भएपनि प्रधानमन्त्री ओलीेले अध्यादेश फिर्ता नहुँदै पुनः परिषद्को बैठक बोलाएका हुन् ।
बैठक पुरानै ऐन अनुसार बस्ने कि नयाँ जारी गरेको अध्यादेश अनुसार बस्ने भन्ने बारेमा भने अन्यौलता कायम छ । किनकी अध्यादेश जारी गरेलत्तै प्रमुख प्रतिपक्षी दल लगायत पार्टी भित्रैबाट पनि कडा विरोध भएको थियो । अध्यादेश जारी भएपछि काँग्रेस सभापती शेरबहादुर देउवाले बैठक बहिष्कार गरेका थिए ।
सो अघिका बैठकमा प्रतिपक्षी दल नेपाली कांग्रेसका सभापति शेरबहादुर देउवा र सभामुख अग्निप्रसाद सापकोटा अनुपस्थित भएपछि बैठक स्थगित भएको थियो ।आजको बैठकमा पनि देउवा सहभागी हुने नहुने निश्चित छैन । संवैधानिक परिषदमा विपक्षी दलको नेता अनिवार्य हुनुपर्ने कानुनी व्यवस्था छ ।
संवैधानिक परिषद्मा प्रधानमन्त्रीको अध्यक्षतामा प्रधानन्यायाधीश, प्रतिनिधिसभाका सभामुख, राष्ट्रियसभाका अध्यक्ष, प्रतिनिधिसभाका विपक्षी दलका नेता र प्रतिनिधिसभाका उपसभामुख सदस्य रहने व्यवस्था छ। उपसभामुख पद लामो समयदेखि रिक्त छ । बैठक बस्न परिषदका ६ सदस्यमध्ये कम्तीमा ५ जना उपस्थित हुनुपर्छ ।
