१२ माघ २०७९, बिहीबार। सम्पदा र सभ्यताको संरक्षण गर्नु युवा पुस्ताको दायित्व भएको काठमाडौं महानगरपालिकाका मेयर बालेन्द्र साह बताउँछन् ।
काठमाडौंमा बिहीबार आयोजित अमूर्त सम्पदा संरक्षण तथा प्रवर्द्धनका लागि काठमाडौं महानगरपालिकाद्वारा खड्गी सेवा समितिअन्तर्गत ४७ परम्परागत गुठीहरुलाई आर्थिक अनुदान रकम सहयोगको चेक हस्तान्तरण कार्यक्रममा उनले सभ्यता र सम्पदा जोगाउने युवाको अभिभारा रहेको धारणा राखे । उनले अहिलेका युवा पुस्ताले पनि सांस्कृतिक सम्पदाहरुको संरक्षण नगरे विस्तारै सम्पदा र सभ्यताहरु लोप हुँदै जाने दाबी गरे । काठमाडौं उपत्यकावासीले आफ्नो आफ्नो भाषा र संस्कृति, बाजागाजा, सभ्यता, सम्पदा जोगाउने काममा अग्रसर हुन मेयर साहको आग्रह थियो ।
‘हाम्रो सभ्यता र सम्पदा जोगाउन हाम्रो पुस्ता अन्तिम हो कि जस्तो लाग्छ । हामीले अब जोगाएनौँ, संरक्षण गरेर राख्न सकेनौँ भने बिस्तारै अब आउने दिनहरुमा अझै गाह्रो हुनसक्छ,’ उनले भने, ‘काठमाडौं उपत्यकामा बस्ने विभिन्न समुदायले हाम्रो भाषा, साहित्य, संस्कृति, बाजागाजाहरुको सभ्यता, सम्पदा जोगाउने कार्यमा महानगरले सहयोग गर्नेछ । हामीले सभ्यता जोगाउनुपर्ने दायित्व र कर्तव्य छ ।’
महानगरपालिका प्रमुख साहले सभ्यता र संस्कृतिको जगेर्ना गर्न महानगरले सहयोग गर्ने र सभ्यता, संस्कृतिको संरक्षण काठमाडौं महानगरपालिकाको दायित्व र कर्तव्य भएको उनको भनाइ छ ।
