काठमाडौं । नेपाल लगायत विभिन्न देशका सुरक्षा निकायमा कर्म गरी अवकाशप्राप्त पूर्व सुरक्षाकर्मीहरुले आफ्नो हक हित एवं राष्ट्र र राष्ट्रियताप्रति कर्तव्यबोधका निम्ति पूर्व सुरक्षा परिषद गठन गरेका छन् । परिषदले तय गरेको पाँच बुँदे मूलमन्त्रलाई आत्मसाथ गर्दै अगाडि बढ्ने भएको हो ।
पूर्व सुरक्षाकर्मीहरुको उपस्थिति र्याली देशप्रेमी गीतहरुका साथ भद्रकाली, आरएनसी, रत्नपार्क, जमल, घण्टाघर हुँदै कमलादीस्थित नेपाल प्रज्ञा प्रतिष्ठान सभाहलमा औपचारिक कार्यक्रम गरी पूर्व सैनिक केबि राउतको संयोजकत्वमा स्थानीय निकायको वडादेखि पालिका, प्रदेशका पूर्व सुरक्षाकर्मी समेट्ने गरी केन्द्रीय पूर्व सुरक्षा परिषद गठन भएको छ ।
नेपाल र विदेशमा रहेर नेपालीहरुको गौरवगाथा बोकेका सम्पूर्ण सुरक्षा निकायहरु नेपाल प्रहरी, नेपाली सेना, सशस्त्र प्रहरी बल, राष्ट्रिय अनुसन्धान विभाग, भारतीय सेना, सिंगापुर प्रहरी र बेलायती सेनामा कर्म गरी अवकाश प्राप्त सुरक्षाकर्मीहरुले देश र जनताप्रति अवकाश पश्चात् महत्वपूर्ण भूमिका निभाउने उद्देश्यले गठन भएको जनाइएको छ ।
कुनै पनि राजनैतिक दल वा व्यक्तिको प्रभावमा नपरी पूर्वजहरुले गरेको योगदान, बलिदान र एकीकरणको पथचिह्नलाई पछ्याउँदै अगाडि बढ्ने संकल्प लिएको परिषदले जनाएको छ ।
परिषदको उद्घाटन कार्यक्रममा नेपाली सेनाका पूर्व प्रधानसेनापति रुक्माङगत कटुवालले अग्रजहरुले रगत बगाएर जोगाएको देशको सीमा विदेशी र माफियाहरुको सक्रियतामा छिमेकी एवं विदेशी राष्ट्रहरुले शान्ति भूमी राष्ट्रलाई नजानिँदो तरिकाले आक्रमण गर्न थालेकाले राष्ट्रको सीमा र स्वाधीनतामाथिको आक्रमण सबै देशभक्ति मिलेर जोगाउनु पर्नेमा जोड दिए ।
कार्यक्रममा डा. प्रेम सिंह बस्नेत, डा. ठाकुर मोहन श्रेष्ठ, रमेश खरेल, निगम हुमागाई, देवीराम शर्मा लगायत पूर्व उच्च पदस्थ सुरक्षाकर्मीहरुको उपस्थिति रहेको थियो ।
परिषद्ले अगाडि सारेका पाँच मूलमन्त्र यस्ता छन् ।
१) सम्पूर्ण सुरक्षा निकायका पूर्व सुरक्षाकर्मीहरुको एकता
२) राष्ट्र र राष्ट्रियता को सुरक्षा
३) सुरक्षाकर्मीहरुको हक अधिकार सुनिश्चित गर्ने
४) आर्थिक पारदर्शिताको खबरदारी गर्ने
५) कुशल नेतृत्वको विकास गर्ने ।
