काठमाडौँ । प्रधानमन्त्री केपी शर्मा ओलीमाथि आइतबार बिहान नै अविश्वासको प्रस्ताव दर्ता भएको खुलेको छ । आइतबार बिहान ९० जना सांसदहरुले प्रधानमन्त्रीमाथि अविश्वासको प्रस्ताव दर्ता गराएको खुलासा भएको हो ।
संसद सचिवालयमा अविश्वासको प्रस्ताव दर्ता भएपछि नै प्रधानमन्त्री ओलीले आकस्मिक रुपमा मन्त्रीपरिषदको बैठक बोलाएको पाइएको छ । आफुमाथि अविश्वासको प्रस्ताव दर्ता भएपछि प्रधानमन्त्रीले हतारमा नै राष्ट्रपति बाट संसद विघटन गराएका हुन् ।
९० सांसदको हस्ताक्षर सहितको प्रस्तावमा प्रधानमन्त्रीको रुपमा भने पुष्पकमल दाहाललाई अगाडी सारिएको थियो । संविधानमा प्रधानमन्त्रीविरुद्ध अविश्वास प्रस्ताव ल्याउँदा प्रस्तावित प्रधानमन्त्रीको नाम उल्लेख गर्नुपर्ने प्रावधान राखिएको छ ।
प्रस्तावमा प्रधानमन्त्री ओलीले संसद विघटनको सिफारिस गरेको सूचना सञ्चार माध्यमबाट सुन्नमा आएको भन्दै यसले नेपालको संविधानलाई आघात पुर्याएको भन्दै ुप्रतिनिधिसभामा बहुमत हुँदाहुँदै जनताका प्रतिनिधिप्रति अविश्वास गरि प्रधानमन्त्री पदबा बसिरहन नसक्ने स्थिति स्वयंले स्वीकार गरेको उल्लेख गरिएको छ ।
९० सांसदले हस्ताक्षर गरेको प्रस्तावको पहिलो नम्बरमा नेकपा अध्यक्ष दाहालले हस्ताक्षर गरेका छन् भने उनीपछि वरिष्ठ नेता झलना खनाल र माधव कुमार नेपालले हस्ताक्षर गरेका छन् । मन्त्रीहरु गिरिराजमणि पोखरेल, वर्षमान पुन, विना मगर, शक्तिबहादुर बस्नेत र रामेश्वर राय यादवले पनि प्रस्तावमा हस्ताक्षर गरेका छन् । यी सबै मन्त्रीले आइतबार नै पत्रकार सम्मेलन गरी पदबाट राजीनामा दिइसकेका छन् ।
