काठमाडौँ । संसद विघटनपश्चात तटस्थ रहेका गृहमन्त्री रामबहादुर थापा बादलले नेकपा उपाध्यक्ष वामदेव गौतमसँग भेटवार्ता गरेका छन् ।
पार्टी फुटको संघारमा पुगेपछि ओली पक्ष र प्रचण्ड–माधव पक्ष छुट्टाछुट्टै छलफलमा जुट्न थालेपछि हालसम्म तटस्थ देखिएका वामदेव र बादलले भेटवार्ता गरेका हुन् । गौतमलाई भेट्न बादल केहीबेर अघि मात्र भैँसेपाटी पुगेका हुन् ।
उपाध्यष वामदेव गौतमले यसअघि नै कुनैपनि पक्षको छलफलमा नजाने निर्णय गरिसकेका थिए । प्रचण्ड–नेपाल पक्षका नेताहरु माधव नेपाल, झलनाथ खनाल र नारायणकाजी श्रेष्ठ उनकै निवासमा पुगेर आफुलाई साथ दिनका लागि आग्रह गर्दासमेत उपाध्यक्ष गौतमले अस्वीकार गरेका थिए । उनले पार्टी फुटको साक्षी नहुने भन्दै दुबै पक्षको छलफल बहिस्कार गरेका हुन् ।
यता, गृहमन्त्री राम बहादुर थापा पनि मंगलबारसम्म कुनैपनि समुहको बैठकमा गएका छैनन् । उनलाई पार्टीका कार्यकारी अध्यक्ष प्रचण्डले समेत मंगलबार बिहान मन्त्रीक्वार्टर मा नै पुगेर साथको लागि आग्रह गरेका थिए । तर बादलले भने आफ्नै समुहसँग छलफल चलाएका थिए ।
हालसम्मको तटस्थता र गौतम–बादलको भेटवार्तालाई अर्थपूर्ण रुपमा हेरिएको छ ।
