काठमाडौँ । फुटको संघारमा पुगेको नेपाल कम्युनिस्ट पार्टी (नेकपा) को केपी ओली समूहले अध्यक्ष पुष्पकमल दाहाललाई कारवाही गर्ने निर्णय गरेको छ । बालुवाटारमा बिहीवार बसेको केन्द्रीय कमिटी बैठकले प्रचण्डलाई कारवाही गर्दै यसअघि दिइएको कार्यकारी हैसियत खोस्ने निर्णय गरेको हो ।
ओली समूहले प्रचण्डलाई अध्यक्षबाट भने हटाएको छैन । प्रधानमन्त्री समेत रहेका पहिलो वरियताका अध्यक्ष केपी शर्मा ओलीले यसअघि नै आफु कसैलाई पनि पार्टीबाट निकाल्ने पक्षमा नरहेको स्पष्ट पारिसकेका छन् ।
राजनैनितक रुपमा विभाजन भइसकेको भएतापनी ओली समूहले प्रचण्ड–माधव समूहमा लागेका कसैको पनि नाम हटाएको छैन । राजनीतिक विभाजन भएपनि पार्टी एकता हँदा नेकपामा भएका सम्पुर्ण केन्द्रीय सदस्यहरुको नाम यथावत् रहेको प्रधानमन्त्रीका प्रेस सल्लाहकार तथा केन्द्रीय सदस्य सुर्य थापाले जानकारी दिएका छन् ।
यता, प्रचण्ड–माधव समूहले भने प्रधानमन्त्री केपी शर्मा ओलीलाई पार्टीको अध्यक्षबाट हटाइसकेको छ । सो समूहले ओलीको ठाउँमा वरिष्ठ नेता माधव कुमार नेपाललाई अध्यक्ष चयन गरेको छ । त्यस्तै उक्त समूहले ओलीलाई हटाउँदै पुष्पकमल दाहाल प्रचण्डलाई संसदीय दलको नेता समेत चयन गरेको छ ।
