काठमाडौँ । नेपाल कम्युनिस्ट पार्टी (नेकपा) को प्रचण्ड–माधव समुहको प्रदर्शन सुरु भएको छ । मंगलबार देशव्यापी प्रदर्शनको घोषणा गरेको प्रचण्ड–माधव समुहले उपत्यकामा मात्रै एक लाख कार्यकर्ता उतार्ने दाबी गरेका थिए ।
प्रधानमन्त्रीको कदम असंवैधानिक र निरंकुश भएको भन्दै संसद विघटनविरुद्ध प्रचण्ड–माधव समुहले आन्दोलनको घोषणा गरेको हो ।
काठमाडौँको विभिन्न स्थानबाट नाराबाजीसहितको र्याली शुरु भइसकेको छ । टेकु, कुलेश्वर, कुपण्डोल, नयाँ बानेश्वर, पुरानो बानेश्वर, न्यूरोड, नक्शाल, रत्नपार्क, त्रिचन्द्र कलेज, बागबजार, वाल्मिकी क्याम्पस, लगायतका स्थानबाट निस्किएको र्याली भृकुटीमण्डप पुगेर सभामा परिणत हुने छ ।
भृकुटीमण्डपको सभालाई अध्यक्षद्वय प्रचण्ड, माधव नेपाल, वरिष्ठ नेता झलनाथ खनाल र प्रवक्ता नारायणकाजी श्रेष्ठले सम्बोधन गर्नेछन् ।
राजधानीको विभिन्न स्थानबाट निस्किएको र्यालीको नेतृत्व पनि प्रचण्ड–माधव समूहका केन्द्रीय नेताहरुले गरेका छन् । टेकुबाट युवराज ज्ञवाली, कुलेश्वरबाट बेदुराम भुसाल, कुपण्डोलबाट पम्फा भुसाल, नयाँ बानेश्वरबाट लिलामणि पोखरेल, मैतीदेवीबाट हरिबोल गजुरेल, नक्सालबाट जनार्दन शर्मा, न्यूरोडबाट अष्टलक्ष्मी शाक्य, रत्नपार्कबाट मुकुन्द न्यौपाने, त्रिचन्द्रबाट योगेश भट्टराई, पुरानो बानेश्वरबाट अमृत बोहोरा, बागबजारबाट गिरिराजमणि पोखरेल, वाल्मिकीबाट गणेश साहले जुलुशको नेतृत्व गरेका छन् ।
राजधानी बाहिर पनि संसद विघटनविरद्ध प्रदर्शन शुरु भएको छ ।
