काठमाडौँ । नेपाल कम्युनिस्ट पार्टी (नेकपा) को प्रचण्ड–माधव समूहको अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीको कदमविरुद्ध निर्णायक परिणाम नआएसम्म नछोड्ने बताएका छन् ।
मंगलबार राजधानीको भृकुटीमण्डपमा आयोजति विरोध प्रदर्शनमा सम्बोधन गर्दै अध्यक्ष प्रचण्डले ओलीको निरंकुश प्रवृत्ती विरुद्ध यो भन्दा पनि कडा कदम चाल्नुपर्ने बताएका छन् ।
आजको कार्यक्रम र विरोध सभा एक ट्रेलरमात्र भएको समेत उनले बताएका छन् । संविधानको रक्षा, जनताको सार्वभौम अधिकार र सिंगो नेपालको भविष्य जोगाइराख्नका लागि अति नै कठोर कदम पनि चाल्नको लागि तयार रहेको बताउँदै अध्यक्ष दाहालले त्यसका लागि सम्पुर्ण कार्यकर्ताहरुलाई तयारी अवस्थामा रहन निर्देशन दिएका छन् ।
अध्यक्ष दाहालले प्रधानमन्त्री र राष्ट्रपतितर्फ इंगित गर्दै २ जनाले व्यक्तिले सदनको हत्या गरेको बताएका छन् । संविधानको विपरित गएर चालिएको कदमका विरुद्ध जस्तो सुकै कठोर कदम पनि चाल्नुपर्ने अध्यक्ष दाहालले बताए । ‘जरुरी परे यो भन्दा पनि कठोर संघर्षमा जानुपर्छ, तपाईँहरु तयारीमा रहनुहोला, हामी छोड्नेवाला छैनौँ ,केके तयारी गर्नुछ गरिहाल्नुस्’ उनले कार्यकर्ताहरुलाई निर्देशन दिँदै भने ।
प्रधानमन्त्री ओलीले प्रतिगमनको बाटो समातको भन्दै अध्यक्ष दाहालले त्यसको विरुद्ध सम्पुर्ण राजनीतिक शक्तिहरुलाई पनि एक ठाउँमा उभिन अपिल गरेका छन् । संविधानको ठाडो उल्लंघन गरेको कारण मुलुकमा लोकतान्त्रिक पद्धती कायम गराइराख्न सबै लोकतान्त्रिक संगठन र पार्टीहरु एक ठाउँमा आउन अनुरोध गरेका छन् ।
