काठमाडौँ । प्रदेश नम्बर १ का मुख्यमन्त्री शेरधन राईले १५ जना सांसदलाई निलम्वन गरेका छन् । प्रधानमन्त्री केपी शर्मा ओली समूहका केन्द्रीय नेता समेत रहेका राईले आफुविरुद्ध अविश्वास प्रस्ताव दर्ता गर्ने प्रचण्ड–माधव समूहका सांसदहरुलाई कारबाहीस्वरुप निलम्बन गरेका हुन् ।
बिहीवार एक विज्ञप्ती जारी गर्दै मुख्यमन्त्री राइले आफ्नो दल र दलका नेतालाई जानकारी नै नदिई मुख्यमन्त्रीविरुद्ध अविश्वासको प्रस्तावमा हस्ताक्षर गरेको भन्दै १५ जना सांसदलाई तीन महिनाको लागि निलम्बन गरेका जानकारी दिइएको छ ।
निलम्बन पर्नेमा प्रदेश सांसद् भीमप्रसाद आचार्य, जीवन घिमिरे, ईन्द्रबहादुर आङ्बो, विजयकुमार विश्वास, सावित्राकुमारी रेग्मी, उपेन्द्र घिमिरे, लिलावल्लभ अधिकारी, राजेन्द्रकुमार राई , यशोधा अधिकारी, लछुमन तिवारी, मोहन कुमार खड्का, कुलप्रसाद साम्बा, धिरेन्द्र शर्मा, टंक आङबुहाङ, कुसुम कुमारी श्रेष्ठ छन् ।
अविश्वासको प्रस्ताव दर्ता गर्ने १९ जनासँग स्पष्टीकरण सोधिएको थियो । चार जना सांसदहरु तुलसीप्रसाद न्यौपाने, उषाकला राई, झलकबहादुर मगर र रामकुमार राईले मौखिक जवाफ दिएकोका कारबाही नगरिएको बताइएको छ ।
मुख्यमन्त्री राईले यसअघि नै प्रदेशका आर्थिक मामिला तथा योजना मन्त्री इन्द्रबहादुर आङवोलाई बर्खास्त गरिसकेका छन् । आज नै प्रचण्ड–माधव पक्षका सांसदहरुले मुख्यमन्त्री राईलाई संसदीय दलको नेताबाट समेत हटाइसकेको छ । उनलाई हटाएर भीम आचार्यलाई संसदीय दलको नेता चयन गरिसकेको छ ।
