जनकपुर । नेपाल कम्युनिस्ट पार्टी (नेकपा)को प्रचण्ड–माधव समूहले प्रदेश २ का नेकपा संसदीय दलका नेता सत्यनारायण मण्डलविरुद्ध अविश्वासको प्रस्ताव दर्ता गरेको छ । उनि प्रधानमन्त्री ओली समूहमा लागेपछि प्रचण्ड–माधव समूहका नेताहरुले उनिबिरुद्ध अविश्वासको प्रस्ताव दर्ता गरेको हो ।
प्रदेश सभामा नेकपाका ३२ जना सदस्यमध्य १७ जनाले उनिविरुद्धको अविश्वास प्रस्तावमा हस्ताक्षर गरेका छन् । संसदीय दलको नेतामाथि अविश्वासको प्रस्तावका लागि एक चौथाई प्रदेश सभा सदस्यहरुको हस्ताक्षर आवश्यक हुनेमा मण्डलविरुद्ध १७ जना सांसदले हस्ताक्षर गर्दै अविश्वासको प्रस्ताव दर्ता भएको हो ।
प्रचण्ड–नेपाल समूहले संसदीय दलको नेतालाई हटाउनका लागि प्रदेश २ नेकपाका उपनेता रामकुमार यादव समक्ष अविश्वासको प्रस्ताव दर्ता गराइएको जानकारी दिएको छ ।
प्रदेश २ मा नेकपाका ३२ सांसदमध्य २० जना प्रचण्ड–माधव समूहमा छन् भने ओली समूहमा १२ जना रहेका छन् । केही दिनअघि प्रधानमन्त्री ओलीले प्रदेश २ को इन्चार्जको रुपमा सत्यनारायण मण्डललाई चयन गरेको थियो ।
