काठमाडौँ । सरकारले कोरोनाभाइरसको परिक्षण दर घटाएको छ । दैनिक १०÷१२ हजारको संख्यामा कोरोना परिक्षण हुने क्रम महिना दिनदेखि घट्दै गएको हो । स्वास्थ्य मन्त्रालयका अनुसार मंगलबार जम्मा ४ हजार ५ सय ५१ जनामा कोरोना परिक्षण भएको थियो ।

सोही परिक्षणमा ५ सय २२ जनामा कोरोनाभाइरस संक्रमण पुष्टि भएको छ । हालसम्म नेपालमा कोरोना संक्रमितको कुल संख्या २ लाख ८४ हजार ३३८ पुगेको छ । मंगलबार गरिएको परिक्षणमा १८४ महिला र ३३८ पुरुषमा कोरोना भाइरस संक्रमण पुष्टि भएको हो ।

मन्त्रालयका अनुसार हाल देशभर ५ हजार २ सय २५ सक्रिय संक्रमित रहेका छन् । यो संख्या कुल संक्रमित संख्याको १ दशमलव १९ प्रतिशत मात्रै हो । आज देशभरि ५ सय ७८ जना डिस्चार्ज भए । डिस्चार्ज हुनेको कुल संख्या २ लाख ५५ हजार ६६६ रहेको मन्त्रालयले जनाएको छ । यो संख्या कुल संक्रमितको ९७ दशमलव ३ प्रतिशत हो ।

मंगलबार नै कोरोना संक्रमणको कारण ८ जनाले ज्यान गुमाए । हालसम्म कोरोनाबाट ज्यान गुमाउनेको संख्या १ हजार ८९३ पुगेको छ ।
मन्त्रालयका अनुसार हालसम्म १९ लाख ५७ हजार ४५४ जनाको कोरोना परिक्षण गरिएको छ । संक्रमित मध्य ३ सय ४२ जना क्वारेन्टाइनमा रहेका छन् ।