काठमाडौँ । काठमाडौ उपत्यकामा चिसो सँगै वायुप्रदूषण पनि बढेको वातावरण विभागले जानकारी दिएको छ । मंगलबार एक विज्ञप्ती जारी गर्दै विभागले मौसम परिवर्तनसँगै काठमाडौ उपत्यकासहित विभिन्न शहरमा प्रदुषण बढेको बताएको छ ।
विभागका महानिर्देशक मुकुन्दप्रसाद निरौलाले जारी गरेको विज्ञप्तीमा उपत्यकामा बिहान बेलुकीको समयमा अत्याधिक बढेको जानकारी दिइएको छ । उपत्यकाको वायूमण्डलमा आइतबारदेखि अत्याधिक मात्रामा प्रदूषण देखिएको हो ।
विभागले मूटुरोगी र अन्य श्वासप्रश्वास सम्बन्धी रोगी लगायत वृद्ध र बालकहरुलाई घरबाहिर ननिस्कनका लागि आग्रह गरेको छ । त्यस्तै स्वस्थ व्यक्तिहरुलाई पनि विशेष कामको अलावा घरबाहिर ननिस्कनका लागि आग्रह गरेको छ । निस्कनै पर्ने भए स्वास्थ्य सुरक्षा अपनाएर मात्र हिँड्नका लागि अनुरोध गरेको छ ।
विज्ञप्तिमा नेपालगञ्ज, विराटनगर लगायतका क्षेत्रमा पनि वायु प्रदूषणको मात्रा उच्च भएको पाइएको उल्लेख गर्दै तराई क्षेत्रका नागरिकलाई पनि विशेष सतर्कता अपनाउन भनिएको छ ।
विभागले फोहोर र आगो बाल्दा पनि वायु प्रदूषण बढ्ने भएकाले त्यस्तो नगर्न पनि सुझाएको छ । भनिएको छ, ‘वायु प्रदूषण मौसममा पनि भर पर्ने भएकाले मौसम यस्तै भइरहेमा केही दिनसम्म प्रदुषण यस्तै रही रहने अथवा अझै खराब हुनसक्ने सम्भावना भएकाले विशेष सावधानी अपनाउनु हुन अनुरोध गरिन्छ ।’
