काठमाडौँ । गृह मन्त्रालयले महानगरीय प्रहरी वृत्त थानकोटमा कार्यरत प्रहरी निरीक्षक (इन्सपेक्टर) गायत्रीराज शर्मालाई निलम्बन गरेको छ । सेवाग्राहीसँग १५ हजार घुस लिएको अभियोगमा पक्राउ परेका इन्सपेक्टर शर्मालाई छानविनको लागि निलम्बन गरिएको हो ।
बिहीवार प्रहरी प्रधान कार्यलयको सिफारिसमा गृहले उनलाई निलम्बन गरेको हो । कलंकीमा भएको एक दुर्घटनामा अनुसन्धान प्रतिवेदन ढिला बुझाएर नियमित प्रक्रियालाई लम्ब्याएको अभियोग शर्मामाथि छ । त्यसवापत उनले हिरासतमा रहेका व्यक्तिका निकटस्थसँग रकम लिएको आरोप लगाइएको छ । सोही आरोपमा छानविनका लागि उनलाई निलम्बन गरिएको हो ।
थानकोटका प्रहरी नायब उपरीक्षक (डीएसपी) घनश्याम श्रेष्ठले गरेको रिपोर्टिङका आधारमा काठमाडौंका एसएसपी अशोक सिंहले शर्माविरुद्ध छानविन थालेका थिए । शर्मालाई निलम्बन गरिएसँगै छानविनका लागि छुट्टै समिति बनाउने तयारी छ ।
निलम्बित इन्सपेक्टर शर्मा महानगरीय प्रहरी वृत्त थानकोटको मुद्धा शाखामा कार्यरत थिए ।
