बीबीसी । अमेरिकी डेमोक्र्याटिक पार्टीले कायममुकायम राष्ट्रपति डोनाल्ड ट्रम्पविरुद्ध महाअभियोग लगाउने तयारी गरेको छ । बीबीसीका अनुसार ट्रम्पले पदबाट राजिनामा नगरेको खण्डमा उनलाई महाअभियोग लगाउने तयारी गरिएको बताइएको छ ।
ट्रम्पले निर्वाचन परिणामको विरोध गर्दै आएका छन् । गत बुधबार निर्वाचन परिणाम घोषणा हुँदै गर्दा ट्रम्पका समर्थकहरु संसद भवनभित्रै प्रवेश गरि आक्रमण गरेका थिए । आक्रमणपश्चात भएको हिंसामा ५ जनाभन्दा बढी मारिएका थिए ।
उक्त हमलालाई राष्ट्रपति ट्रम्पले पनि समर्थन गरेपछि उनको चौतर्फी आलोचना भएको छ । सामाजिक संजालमार्फत विभिन्न अभिव्यक्ति दिएर आफ्ना समर्थकहरुलाई हिंसामा उत्प्रेरित गरेको आरोप उनिमाथि छ ।
सभामुख न्यान्सी पेलोसीले ट्रम्पमाथि कठोर निर्णय लिन परेपनि पछाडी नहट्ने बताएकी छिन् । यदी सहज रुपमा राजिनामा गर्ने पक्षमा ट्रम्प नदेखिए उनिबिरुद्ध महाअभियोग लगाउने समेत सभामुख न्यान्सीले बताइन् ।
यसबारेमा डेमोक्र्याटिक पार्टीका सांसदहरुले छलफल गर्न थालेका छन् । राष्ट्रपति निर्वाचित जो बाइडनले महाभियोगबारे संसद्ले निर्णय गर्ने बताएका छन्। बाइडनले लामो समयदेखि आफूलाई ट्रम्प राष्ट्रपति पदका लागि योग्य नभएको लागेको बताएका छन्।
ह्वाइट हाउसले भने महाभियोगको विषयलाई राजनीतिक स्वार्थूको कदम भन्दै त्यसले महान देशलाई थप विभाजित गर्ने बताएको छ।
तल्लो सदन हाउस अफ रिप्रिजेन्टेटिभका करिब १६० सदस्यहरूले उक्त विधेयकमा हस्ताक्षर गरेका छन्।
बुधवार क्यापिटलमा भाँडभैलो भइरहँदा उक्त विधेयक क्यालिफोर्निया राज्यका सांसद् टेड लिउ र रोड आइल्यान्डका डेभिड सिसिलीनले मस्यौदा गरेका थिए।यदि महाभियोग प्रक्रिया अगाडि बढ्यो भने त्यो राष्ट्रपति ट्रम्प विरुद्धको दोस्रो महाभियोग प्रयत्न हुनेछ।
डिसेम्बर २०१९ मा तल्लो सदनले ट्रम्पलाई अन्य अभियोगहरूमा महाभियोग लगाउने प्रस्ताव पारित गरेको थियो तर सिनेटले फेब्रुअरी २०२० मा उनलाई सफाइ दिएको थियो।
कुनै पनि अमेरिकी राष्ट्रपतिलाई अहिलेसम्म दुईपटक महाभियोग लागेको छैन। रिपब्लिकनहरूको सिनेटमा बहुमत भएका कारण महाभियोग पारित नहुन सक्छ।
