पोखरा । कास्कीको मादी गाउँपालिकामा १२ मेगावाट क्षमताको जलविद्युत आयोजना सञ्चालन गरिरहेको हिमालयन हाइड्रोपावर लिमिटेडले शनिबार १३ औं साधारण सभा पोखरामा सम्पन्न गरेको छ ।
साधारण सभाले आव २०७६/०७७ को लेखापरीक्षण प्रतिवेदन पारित गरेको छ । सभामा विशेष प्रस्तावमा कम्पनीको प्रवन्ध पत्र नियमावली संसोधन गर्ने प्रस्ताव गरिएको थियो ।
कम्पनी अध्यक्ष खोमबहादुर केसी र सचिव कृष्णप्रसाद भण्डारीले पेस गरेको वार्षिक प्रतिवेदनमा उत्पादन वर्ष भएकाले लगानीकर्तालाई लाभांश प्रस्ताव गरिएको थिएन । कोरोना महामारीका कारण आयोजनाको उत्पादन ६ महिना ढिलो भएकाले लागत परिमार्जन हुने प्रतिवेदन सभामा पेस गरिएको थियो ।
मादीको वडा नं २ साविक नार्माजुङ गाविसमा कम्पनीद्वारा प्रवद्र्धित ‘नामार्जुङ मादी जलविद्युत आयोजना’ निर्माण सम्पन्न भएर आयोजनाले उत्पादन गरेको विद्युत राष्ट्रिय प्रसारण लाइनमा जडान भइसकेको छ ।
गएको भदौ २५ गतेबाट आयोजनाले परीक्षण उत्पादन थालेर व्यावसायिक उत्पादन असोज १२ गते दिउँसो १२ बजेबाट सुरु गरेको थियो ।
मादी नदीको पानी एक हजार २५० मिटर लामो ‘ओपन क्यानल’मार्फत ६४ मिटर उचाईबाट आयोजनाको विद्युत गृहमा खसालेर विद्युत उत्पादन गरिएको हो ।
उत्पादित विद्युत ३३ केभी प्रसारण लाइनमार्फत चार किमी तलको अपरमादी जलविद्युत आयोजनाको १३२ केभीमा जडान गरी त्यसमार्फत १२ किमी टाढाको नेपाल विद्युत प्राधिकरणको लेखनाथस्थित सबस्टेशनमा जडान गरिएको छ । आयोजना गत चैत पहिलो सातानै सम्पन्न भएको थियो ।
कम्पनीको डाइरेक्टरमा शिवकृष्ण श्रेष्ठ, मोनिका थापा, सुकान्त अधिकारी छन् भने प्रमुख कार्यकारी अधिकृत अभिषेक केसी रहेका छन् ।
