काठमाडौँ । प्रधानन्यायाधीश चोलेन्द्र समशेर जबराले नयाँ संवैधानिक इजलास गठन गरेका छन् । यसअघिको सुनुवाईबाट न्यायाधीश हरिकृष्ण कार्कीले संसद विघटनविरुद्धको मुद्धा नहेर्ने भएपछि उनको ठाउँमा मल्ललाई राखेर प्रधानन्यायाधीशले संवैधानिक इजलास गठन गरेका हुन् ।
संवैधानिक इजलासमा आज संसद विघटनविरुद्धको दोस्रो सुनुवाई हुँदै छ । संसद विघटनविरुद्धको मुद्धा वृहत पुर्ण इजलासबाट सुनुवाई हुनुपर्ने माग राख्दै सर्वोच्चमा रिटसमेत दर्ता भएको छ ।
त्यसैले यी मुद्दाको संवैधानिक इजलासमा सुनुवाइ गर्ने कि बृहत् पूर्ण इजलास सुनुवाइ गर्ने भन्ने विवाद छ।
प्रतिनिधिसभा विघटनविरुद्धको रिट निवेदक १३ मध्ये ११ जनाले बृहत् पूर्ण इजलासमा सो विवादको सुनुवाइ गर्न माग गर्दै यही पुस २२ गते पूरक निवेदन दिएका थिए।
यसअघिको सुनुवाईमा अधिवक्ताहरु दिनेश त्रिपाठी, रमण श्रेष्ठ लगायतले बहस गरेका थिए । बहसको क्रममा हरिकृष्ण कार्की यसअघि महान्यायाधिवक्ता भइसकेको कारण नैतिक रुपमा संसद विघटनविरुद्धको मुद्धा हेर्न नमिल्ने बताएका थिए । सोही अनुसार नै न्यायाधीश कार्कीले इजलासमा नबस्ने निर्णय गरेका थिए ।
नयाँ गठन गरिएको इजलासमा सपना प्रधान मल्ल पनि विवादीत बन्ने सम्भावना देखिएको छ । न्यायाधीश मल्ल संविधानसभामा तत्कालीन एमालेबाट समानुपातिक सभासद बनेकी थिइन् ।
