पोखरा । छैटौं राष्ट्रिय योग दिवस नेपालभरिका सरकारी र गैरसरकारी आयुर्वेदकर्मीहरुले भव्यताका साथ मनाएका छन् ।
आयुर्वेद तथा वैकल्पिक चिकित्सा विभागले प्रदेश मातहतका प्रादेशिक आयुर्वेद औषधालय, अञ्चल आयुर्वेद औषधालय र जिल्ला आयुर्वेद स्वास्थ्य केन्द्र र स्थानीय निकाय मातहतका आयुर्वेद औषधालयहरुलाई कोभिड १९ लाई मध्यनजर गर्दै जिल्लामा प्रमुख जिल्ला अधिकारीको समन्वयमा ‘गरौ योग डटेर, कोभिड भाग्छ हटेर’ भन्ने आदर्श वाक्य सहित मनाइएको हो ।
जुन २१ का दिन अन्तर्राष्ट्रिय विश्व योग दिवस नेपालमा मनाउन सुरु गरे पश्चात माघ १ मा राष्ट्रिय याेग दिवस मनाउन ६ बर्ष अगाडि सुरु गरिएको थियो ।
योग शब्दको ब्यूत्पती संस्कृत शब्द ‘युजिर योगे‘बाट भएको हो जसको अर्थ हुन्छ एक हुनु, जोड्नु, मिल्नु । अतः जिवात्मा परात्मासँग एकीकरण हुनु नै योग हो ।
केही आचार्यका अनुसार चरक संहिता र पातञ्जल योगसुत्रका रचनाकार महर्षी पतञ्जली नै भएकाे मानिन्छ । उनका अनुसार चित्तवृत्तिलाई रोकी समाधि प्राप्त गर्नु नै योग हो ।
अभ्यास एवं बैराग्यद्वारा चित्तवृत्ति हटाउन योगका ८ अङ्ग बताइएको छ । जसमा यम, नियम, आसन, प्राणायम, प्रत्याहार, धारणा, ध्यान र समाधि हुन् ।
योगलाई आयुर्वेद कै एक अङ्ग मानिन्छ । मन आत्म र इन्द्रीयलाई विचलित हुन नदिइ परात्मासँग जोड्नु योग हो । नियमित योगाभ्यास विधिपूर्वक गर्ने बानीले मनलाई कहिल्यै विचलित हुन दिँदैन र मन विचलित भएन भने शरीर स्वस्थ हुन्छ । यो अभ्यासले शारीरिक, मानसिक, सामाजिक एवं आध्यात्मिक लाभसहित मोक्ष प्राप्ति हुने आयुर्वेद चिकित्सकहरुको मत रहेको छ ।
