काठमाडौं । प्रधानमन्त्री तथा नेकपा अध्यक्ष केपी शर्मा ओलीले निवर्तमान पर्यटनमन्त्री योगेश भट्टराईलाई इगिंत गर्दै आफूसँग ठूलो युवाको जमात भएको बताएका छन् ।
प्रदेश १ को वृहत कार्यकर्ता भेलालाई काठमाडौंमा सम्बोधन गर्दै ओलीले भ्रममा रहेका युवाहरुलाई पनि समेट्न आग्रह गरे ।
योगेशको नाम नलिई उनले भने, ‘म कुनै बैगुनी केटाकेटीकोबारेमा कुरा गर्न चाहन्नँ, हाम्रै प्रदेशमा पनि त्यस्तै देखिएका छन् । दौडिइ दौडिइकन गएर, यो केटालाई जिताउनुस् मन्त्री बनाएर पठाउँछु भनियो । मन्त्री बनाइयाे । एकदिन पुक्क लात्ताले हानेर भाग्यो । यसो हेरेको त को रहेछ भनेको त्यहीँ केटो !’
प्रदेश १ लाई सबै रुपमा एक बनाउन ओलीको आग्रह थियो । युवाहरुको सक्रियताले देशलाई सजिलो बिन्दुमा पुर्याउन योगदान गर्ने विश्वास ओलीले व्यक्त गरे ।
गत निर्वाचनका क्रममा याेगेश भट्टराईकाे निर्वाचन क्षेत्रमा गई ओलीले याेगेशलाई जनताले जिताएर पठाए मन्त्री बनाइदिने वचन दिएका थिए । पहिलाे चरणकाे क्याबिनेटमा याेगेश नअटाउँदा उनका पक्षधरले ओलीले दिएकाे अभिव्यक्तिकाे साेही भिडिओलाई भाइरल बनाएका थिए ।
पूर्व पर्यटनमन्त्री रवीन्द्र अधिकारीकाे निधनपछि उक्त मन्त्रालयकाे अभिभारा ओलीले याेगेशकाे काँधमा सुम्पिएका थिए । तर नेकपा विभाजन उन्मुख भएपछि याेगेश प्रचण्ड-नेपाल समूहतिर लागेकाले उनले पर्यटन मन्त्रीबाट महिना अघि राजिनामा दिएका थिए ।
