काठमाडौँ । चर्चित गायन रियालिटी शो ‘वाइवाई नेपाल स्टार’को टप ६ बाट आउट भएका सिद्धान्त खड्कालाई वृज सिमेन्टले सहयोग गर्ने भएको छ । सिद्धान्तको घर बनाउनका लागि बृजले निशुल्क रुपमा सिमेन्ट उपलब्ध गराउने भएको हो । निकै उत्कृष्ठ गायन क्षमताको वाबजुद भोटिङको कारण आउट भएका सिद्धान्तको सपनामा वृज सिमेन्टले हातेमालो गर्ने प्रतिवद्धता जाहेर गरेको हो ।
१५ बर्षको उमेरमा आँखा गुमाएका सिद्धान्तले घरको आर्थिक अवस्थाकै कारण पढाई र अध्ययनलाई निरन्तरता दिन नसकेको उनका बाबुले बताएका छन् । परिवारको आर्थिक अवस्था निकै कमजोर भएको कारण सिद्धान्तले अध्ययन त्यागेर संगीतमा लागेका थिए । झापामा सिद्धान्तको परिवार सामान्य घरमा बस्दै आएका छन् । ‘ शुरुमा रेडक्रसले दिएको प्लास्टिक र बाँस प्रयोग गरेर घर बनाएको थिएँ’ उनका बाबुले भनेका छन् । अहिले टिन र बाँसबाट बनेको घरमा सिद्धान्तको परिवार बस्दै आएको छ ।
शोबाट घर फर्किँदैँ गर्दा अत्यन्त भावुक मुद्रामा सिद्धान्तले आफ्नो बाबुआमाको लागि सानो चिटिक्क परेको घर बनाउने सपना रहेको बताएका थिए । अब सिद्धान्तको सोही सपनालाई पुरा गर्न वाइवाइ नेपाल स्टारको प्रायोजक समेत रहेको बृज सिमेन्टले हातेमालो गर्ने भएको छ ।
झापामा सिद्धान्त खड्कासहित उनको परिवार बस्दै आएको घर
वृज सिमेन्ट उद्योगका कार्यकारी निर्देशक मोहित केडियाले सिद्धान्तको घर बनाउन लाग्ने सम्पुर्ण सिमेन्ट निशुल्क रुपमा उपलब्ध गराउने घोषणा गरेका छन् । केडिया अर्गनाइजेशनका कार्यकारी निर्देशक मोहित केडिया, मान्षी केडिया र प्रियंका केडियाले संयुक्त रुपमा सिद्धान्तको घर बनाउने प्रतिवद्धता व्यक्त गर्दै उनलाई सम्मान पत्र प्रदान गरेका थिए ।
वाइवाइ नेपाल स्टारको फाइनल आगामी माघ १७ गते हुने बताइएको छ । जसको प्रत्यक्ष प्रसारण नेपाल टेलिभिजनबाट हुनेछ ।
