काठमाडौँ । नेपाल तीन जनामा नयाँ प्रजातीको कोरोनाभाइरस संक्रमण पुष्टि भएको छ । स्वास्थ्य तथा जनसंख्या मन्त्रालयले सोमबार एक विज्ञप्ती जारी गर्दै बेलायतबाट नेपाल आएका तीन जनामा नयाँ प्रजातीको कोरोना भाइरस संक्रमण पुष्टि भएको जानकारी दिएको छ ।
मन्त्रालयका प्रवक्ता प्राध्यापक डा. जागेश्वर गौतमद्वारा जारी विज्ञप्तीमा बेलायतबाट नेपाल आएका २८ बर्षीया महिला, ६७ र ३२ बर्षीय पुरुषमा उक्त भाइरसको संक्रमण पुष्टि भएको उल्लेख गरिएको छ । जसमध्ये २८ वर्षीय महिला र ३२ वर्षीय पुरुषको हाल आरटीपीसीआर रिपोर्ट नेगेटिभ रहेपनि अर्का ६७ वर्षीय पुरुषमा भने अझै पनि पोजेटिभै रहेको जनाइएको छ ।
उनीहरुमा नयाँ प्रजातिको कोरोना आशंका भएपछि नमुना परीक्षणका लागि हङकङ पठाइएको थियो ।
मन्त्रालयले जबसम्म रोगको भ्याक्सिन नेपालमा उपलब्ध हुँदैन त्यतिन्जेलसम्म सावधानी अपनाउनुपर्नेमा जोड दिँदै भीडभाडमा नजाने, जानु परे पनि दुई मिटरको दुरी कायम राख्ने, बाहिर जाँदा अनिवार्यरुपमा मास्क लगाउनेलगायतका उपाय अपनाउन पनि आग्रह गरेको छ ।
